Yuxarı

Ramiz Fətəliyevin 70 illik yubileyi keçirilib - FOTO

Yubilyar ölkə prezidentinə ona verilən yüksək fəxri adlara görə minnətdarlığını bildirib

Bakı. 7 iyun. REPORT.AZ/ Nizami Kino Mərkəzində məşhur ssenarist və kinorejissor, əməkdar incəsənət xadimi Ramiz Fətəliyevin 70 illik yubileyi  qeyd olunub..

"Report" xəbər verir ki, tədbir ssenarist və kinorejissora həsr edilən videoçarxın nümayişi ilə başlayıb. Ramiz Fətəliyev yubiley gecəsində aparıcılığı özü edib və özü haqqında danışıb.

Tədbirdə çıxış edən Xalq yazıçısı Çingiz Abdullayev Ramiz Fətəliyevlə bağlı xoş xatirələrini bölüşüb.

Mədəniyyət və turizm naziri Əbülfəs Qarayev Ramiz Fətəliyevin Azərbaycan kinosunun tarixində gördüyü böyük işlərdən danışıb. Nazir qeyd edib ki, prezident İlham Əliyevin Ramiz Fətəliyevin Azərbaycan kino tarixindəki xidmətlərinə verdiyi qiymətin göstəricisidir ki, ölkə başçısı məşhur ssenarist və kinorejissoru, əməkdar incəsənət xadimini eyni gündə həm Xalq artisti fəxri adı, həm də "Şöhrət" ordeni ilə təltif edib. 

Tədbir Ramiz Fətəliyevin ssenariləri əsasında çəkilən filmlərdən fraqmentlərin nümayişi ilə davam edib.

Yubilyar jurnalistlərlə söhbətində ölkə prezidentinə ona təqdim edilən yüksək fəxri adlara görə minnətdarlığını bildirib. "Mən 70 yaşıma çatmışam. Amma inanmıram ki, bu yaşdayam. Əgər bu yaşa gəlib çatmışamsa, deməli nəsə etmişəm. Yubileyimin təmtəraqlı keçirilməsinə görə, dövlət rəhbərinə, Mədəniyyət və Turizm Nazirliyinə minnətdaram" - deyə Ramiz Fətəliyev bildirib.

Ramiz Fətəliyev 1946-cı il iyunun 7-də Bakıda anadan olub. O, 40-dan artıq bədii filmin ssenari müəllifidir. Onların arasında “Altıncı”, “Ailə işi” (1982, rej. Nikolay Maletskiy), “Şahidsiz” (1983, Nikita Mixalkov), “Sizi dünyalar qədər sevirdim” (1985, Rasim İsmayılov), “Yeni evlənənlər üçün çətir” (1986, Rodion Naxapetov), “Yaramaz” (1988, Vaqif Mustafayev) və digər yaddaqalan filmlər var.

İki teleserialın — “Anın həqiqəti” (2003, Azərbaycan), “Qraf Krestovski” (2004, Rusiya) və “Hökmdarın taleyi” (2007) bədii filminin quruluşçu rejissorudur.

Ramiz Fətəliyev 1987-1995-ci illərdə “Azərbaycanfilm” kinostudiyasının direktoru olub.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi