"Origin" müasir incəsənət sərgisi keçiriləcək

Bakı. 21 noyabr.REPORT.AZ/ Noyabrın 21-də Bakıdakı "Kiçik Qalart" sərgi salonunda "Origin" müasir incəsənət sərgisinin açılışı keçiriləcək.

"Report" xəbər verir ki, bu barədə Rəssamlıq İttifaqından yayılan məlumatda bildirilib. Sərgidə iki gənc heykəltəraş, azərbaycanlı Elvin Nəbizadə və İrandan olan Həbib Saherin işləri sərgilənəcək.
Elvin və Həbib Azərbaycan Dövlət Rəssamlıq Akademiyasının heykəltəraşlıq fakültəsinin məzunlarıdırlar. Onların işləri dəfələrlə Azərbaycanda və xarici ölkələrdə, YARAT müasir incəsənət təşkilatının proyektlərində, Rəssamlar İttifaqı və Azərbaycan Dövlət Rəssamlıq Akademiyasının sərgilərində yer alıb.