Yuxarı
    Bağlamaq

    Lənkəran Dövlət Dram Teatrında yeni tamaşanın premyerası keçirilib

    Elçinin pyesi əsasında hazırlanan Cəhənnəm sakinləri adlı tamaşa repressiya dövrünün acı həqiqətlərindən bəhs edir

    Bakı. 27 may. REPORT.AZ/ N.Vəzirov adına Lənkəran Dövlət Dram Teatrında yeni tamaşanın premyerası keçirilib. "Report"un xəbərinə görə, xalq yazıçısı Elçinin eyniadlı pyesi əsasında hazırlanan "Cəhənnəm sakinləri" adlı tamaşanın quruluşçu rejissoru Gümrah Ömər, quruluşçu rəssamı Tərlan Sadıqov, musiqi tərtibatçısı Fərahim Fərəcovdur. İkihissəli dram janrında hazırlanan səhnə əsərində xalq artisti Qabil Quliyev (Kişi), Əməkdar artist Adil Zeynalov (Zabit), aktyorlar Qızılgül Əliyeva (Qadın), Aynur Əhmədova (Gənc qadın), Əbülfəz Axundov (Qonaq) və Tərlan Abdullayev (Pioner) çıxış edirlər.

    Tamaşanı izləyənlər arasında rayonun teatr ictimaiyyəti ilə yanaşı, Lənkəran Şəhər İcra Hakimiyyətinin başçısı Taleh Qaraşov və aparat üzvləri, Bakı teatrlarının nümayəndələri də olublar.

    Tamaşa Azərbaycan tarixinə qanlı hərflərlə yazılmış dəhşətli və qorxulu repressiya dövrünün acı həqiqətlərindən bəhs edir. Yaradıcı kollektiv dövrün mürəkkəbliklərinə baxmayaraq, isti və normal münasibətlərini qoruyub saxlayan azərbaycanlı ziyalı ailəsində ərlə-arvadın təzadlı tale yoluna güzgü tutaraq, tamaşaçıları xeyirxahlığa, yaxşılığa, mərhəmətli olmağa səsləyir. Səhnə əsərində cərəyan edən dramatik hadisələr, eləcə də birmənalı yozula bilinməyəcək obrazlar real və irreal dünya arasında körpü yaradır.

    Rejissor konkret olaraq 1937-ci ili, Stalin dövrünün hadisələrini deyil, ümumilikdə insan taleyini, dəhşətli mənəvi ortamda qəhrəmanların yaşadıqları hissləri, insanın qorxularını yozumunun mərkəzinə qoyub.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi