Yuxarı

​“Dilmanc” öz proqramlarında DNN nəzəriyyəsini tətbiq edir

Artıq istifadəçilər şifahi nitqi kompüterdə yazmaq üçün öz mobil telefonlarını mikrofon kimi istifadə edə biləcəklər

Bakı. 2 mart. REPORT.AZ/ Rabitə və Yüksək Texnologiyalar Nazirliyinin (RYTN) Azərbaycan dili üçün intellektual texnologiyaların yaradılması ilə məşğul olan “Dilmanc” layihəsi təbii dillərin emalı (Natural Language Processing - NLP) sahəsində Dərin Neyron Şəbəkələr (Deep Neural Networks - DNN) nəzəriyyəsini öz proqramlarında tətbiq etməyə başlayıb.

“Report” nazirliyə istinadən xəbər verir ki, layihə qrupundan verilən məlumatda Dərin Neyron Şəbəkələr yanaşması “Dilmanc” layihəsində ilk olaraq Azərbaycan dilində nitqin tanınması sisteminə tətbiq edildiyi qeyd olunub.

Məlumatda bildirilib ki, hazırda bu yanaşmanın köməyilə hazırlanmış “Dilmanc Translator” proqramının yeni versiyasında Azərbaycan dilində şifahi nitqi daha keyfiyyətlə mətnə çevirərək tərcümə edə bilir. Yaxın vaxtlarda kompüter istifadəçiləri də şifahi nitqi mətnə çevirən “Dilmanc İmla” sisteminin yeni versiyasından istifadə edə biləcəklər. Bu sistem əvvəlkindən həm keyfiyyətinin yüksək olması, həm də bahalı mikrofona ehtiyac olmaması ilə fərqlənəcək. Belə ki, artıq istifadəçilər öz mobil telefonlarını mikrofon kimi istifadə edə biləcəklər. Telefona deyilən şifahi nitqi kompüterdə “Microsoft Word” və ya bu tipli istənilən digər mətn prosessorunda klaviaturadan istifadə etmədən yazmaq mümkün olacaq. Bu zaman telefon və kompüterin internetə qoşulması kifayətdir.

əlavə olaraq bildirilib ki, əslində Neyron Şəbəkələr yanaşması yeni deyil. Amma effektiv öyrətmə alqoritmlərinin olmaması, həmçinin hesablama avadanlıqlarının zəif olması səbəbindən kifayət qədər keyfiyyətli sistemlərin hazırlanması mümkün olmayıb. “Dilmanc” layihəsi hal-hazırda nitqin tanınması sisteminin akustik modelin öyrədilməsi üçün 768 nüvəli qrafik prosessordan, dil modelinin öyrədilməsi üçün isə hər birinin 8 nüvəsi olan 30 serverdən ibarət paylanmış hesablama klasterindən istifadə edir.

Qeyd edək ki, layihənin elmi rəhbəri rabitə və yüksək texnologiyalar naziri Əli Abbasovdur.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi