“Bakı Fil Ekspo” V Milli Filateliya sərgisi işə başlayıb

Bakı. 8 noyabr. REPORT.AZ/ Bu gün Nəqliyyat, Rabitə və Yüksək Texnologiyalar Nazirliyinin, qurum yanında “Azərmarka” MMC-nin  və Azərbaycan Filatelistlər İttifaqının təşkilatçılığı ilə Xalça Muzeyində “Bakı Fil Ekspo” V Milli Filateliya sərgisinin açılışı olub.

"Report" xəbər verir ki, sərgidə nazir müavini Elmir Vəlizadə, Dənizkənarı Bulvar İdarəsinin sədrinin müavini Elşən İsgəndərov, “Azərmarka”nın direktoru Leyla Güləliyeva, Azərbaycan Filatelistlər İttifaqının sədr müavini Rövşən Əhmədov, filatelistlər, numizmatlar və digər kolleksiyaçılar iştirak edib.

E.Vəlizadə qeyd edib ki, Azərbaycan Dövlət Bayrağının 100 illiyi kimi əlamətdar günün astanasında belə tədbirin keçirilməsi xüsusi əhəmiyyət daşıyır. Onun sözlərinə görə, 2018-ci il Azərbaycan üçün əlamətdar hadisələrlə zəngin olub. Azərbaycan Xalq Cümhuriyyətinin, Milli Ordumuzun, Azərbaycan Qadınına səsvermə hüququnun verilməsinin 100 illiyinin qeyd edilməsi də bu qəbildəndir.

“Bildiyiniz kimi, bu ilin 9 noyabrında Azərbaycan Dövlət Bayrağının təsis edilməsinin 100 ili tamam olur. Hesab edirəm ki, milli filateliya sərgisinin bu qürurlu tarixə həsr olunması onun əhəmiyyətini daha da artırır. Sərgi Prezident İlham Əliyevin “Azərbaycan Xalq Cümhuriyyətinin 100 illik yubileyinin keçirilməsi” və “Azərbaycan Xalq Cümhuriyyəti İli” elan edilməsi haqqında müvafiq sərəncamlarına uyğun olaraq təşkil edilib. İnanıram ki, “BakıFilEkspo” V Milli filateliya sərgisi də Azərbaycan filateliyasının, ümumiyyətlə, kolleksiyaçılığın tarixində yeni mərhələ olacaq”, - deyə nazir müavini qeyd edib.

R.Əhmədov isə deyib ki, sərgidə 7 nominasiyada müsabiqələrin keçirilməsi planlaşdırılır. Onun sözlərinə görə, ümumiyyətlə, sərgidə bütün nominasiyalarda 19 kolleksiya, 34 çap işi nümayiş etdirilir.

“Bunlardan 4 toplu rəsmi dərəcədə, 20 çap işi müsabiqədən kənar dərəcəsində, 8 toplu filateliya sinfində, 3 toplu filokartiya və fuluminiya sinfində, 4 toplu numizmatika sinfində və 14 çap işi ədəbiyyat sinfində təqdim edilir. Müsabiqə dərəcəsində göstəriləcək 19 topludan 13-ü isə ilk dəfə nümayiş etdirilir”, - deyə o vurğulayıb.

R.Əhmədov qeyd edib ki, milli filateliya sərgisində Azərbaycan dövlətçiliyinin önəmli səhifələrinə həsr olunmuş “Azərbaycan Xanlıqlarının pul dövriyyəsi tarixi” adlı sikkə kolleksiyası da ilk dəfə nümayiş olunur. 300-ə qədər sikkədən ibarət olan kolleksiyada Gəncə, Şəki, Şirvan, İrəvan, Quba, Təbriz, Dərbənd və Qarabağ xanlıqları təmsil olunur.

Sonra kolleksiyalara baxış keçirilib.

Tədbirdə bir-birindən fərqli, nadir kolleksiyalar nümayiş etdirilib. Cümhuriyyət dövrünün poçt tarixi, SSRİ dönəmində Azərbaycana həsr olunmuş markalı zərflərin buraxılışı, 1992-2018-ci illərdə Azərbaycanda buraxılmış maraqlı poçt markaları və digər kolleksiyalar böyük maraq doğurub.

E.Vəlizadə və E.İsgəndərov Azərbaycan Dövlət Bayrağına həsr edilmiş poçt markasını xüsusi ştempellə möhürləyiblər.

Filateliya sərgisində şəxsiləşdirilmiş poçt markaları bir neçə çeşiddə çap olunaraq iştirakçılara təqdim olunub.

“Azərmarka” və “Num.az” MMC-nin köşklərində filateliya və numizmatika üzrə materialların və aksesuarların da satışı təşkil edilib.

V Milli Filateliya sərgisində nümayiş etdikləri kolleksiyalara görə “Azərmarka” 7 nəfəri xatirə qızıl medalı ilə, 5 nəfəri xatirə gümüş medalı ilə, 5 nəfəri xatirə bürünc medalı, 3 nəfəri isə diplomla təltif edib. 

Sərgi sabah başa çatacaq.