Yuxarı
    Bağlamaq

    Azərbaycan futbol yığmasının İslamiadada keçirəcəyi qrup oyunlarına bütün biletlər satılıb

    Açılış Mərasimi üçün D kateqoriyalı biletlər də artıq qurtarıb

    Bakı. 1 may. REPORT.AZ/ Azərbaycanın 23 yaşadək futbolçulardan ibarət milli komandasının "Bakı 2017" İslam Həmrəyliyi Oyunlarındakı qarşılaşmaları üçün satışa çıxarılan bütün biletlər satılıb.

    Bu barədə "Report"a Oyunların Əməliyyat Komitəsindən məlumat verilib.

    Bildirilir ki, futbol yarışlarını izləmək istəyən azarkeşlər üçün yarışın qrup mərhələsinin digər oyunlarına müəyyən sayda bilet qalıb. Bunlar Türkiyə, Kamerun, Əlcəzair və Səudiyyə Ərəbistanının iştirakı ilə matçlar, habelə yarım final, bürünc medal və final qarşılaşmalarıdır. Azərbaycan yığması mayın 8-də Kamerun, mayın 11-də Səudiyyə Ərəbistanı, mayın 15-də isə Mərakeşlə üz-üzə gələcək. 

    Mayın 8-də start götürəcək qrup mərhələsinin oyunları "Dalğa Arena", "AZAL Arena" və "Bayıl Arena"da olacaq. Biletlər Baku2017 veb-saytı – www.baku2017.com vasitəsilə onlayn rejimdə və ya Bakıda yerləşən 12 satış məntəqəsində, o cümlədən, 28 Mall, Gənclik Mall və Park Bulvar ticarət mərkəzlərində satışdadır.

    Ev sahibi olan Azərbaycan komandasını dəstəkləmək və ona azarkeşlik etmək istəyindən irəli gələrək, məhz yerli idmançıların qatıldıqları bütün idman yarışlarına bilet satışı yüksəkdir.

    Mayın 12-də keçiriləcək Açılış Mərasimi üçün D kateqoriyalı biletlər də artıq satılıb qurtarıb. Çox məhdud sayda A, B və C kateqoriyalı biletlər hələ də satışdadır.

    Qeyd edək ki, İslamiadada dörd qitədə yerləşən 57 ölkədən 3000-dək idmançı iştirak edəcək. İdmançılar futbol, atletika, gimnastika, güləş və boks daxil olmaqla 20 idman növü üzrə 270 medal dəsti uğrunda mübarizə aparacaq. 

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi