Yuxarı

Biləsuvarda şəhid ailələrinə medallar təqdim olunub

Azərbaycan əsgəri işğal altında olan torpaqları azad etmək uğrunda müqəddəs savaşa hər an hazır və qadirdir

Bakı. 3 avqust. REPORT.AZ/ Azərbaycan Respublikasının müstəqilliyinin, ərazi bütövlüyünün qorunub saxlanılmasında xüsusi xidmətlərinə, xidməti vəzifələrini və hərbi hissənin qarşısında qoyulmuş tapşırıqları yerinə yetirərkən fərqləndiklərinə görə Azərbaycan Prezidenti İlham Əliyevin 2015-ci il 24 iyun tarixli Sərəncamı ilə ölümündən sonra “Hərbi xidmətlərə görə” medalı ilə təltif olunmuş Silahlı Qüvvələrin hərbi qulluqçuları, gizir Əliyev Pərvin Səlahəddin oğlu və kiçik gizir Hüseynov Rahil Əfsər oğlunun, eləcə də Azərbaycan Prezidentinin adından müdafiə naziri, general-polkovnik Zakir Həsənovun əmri ilə ölümündən sonra “Hərbi xidmətdə fərqlənməyə görə” 3-cü dərəcəli medalla təltif olunmuş gizir Əlizadə Şahmurad Hilal oğlunun medalları təntənəli şəkildə ailələrinə təqdim edilib.

Müdafiə Nazirliyinin mətbuat xidmətindən "Report"a verilən məlumata görə, Biləsuvar şəhərindəki Heydər Əliyev Mərkəzində keçirilən mərasim Azərbaycanın dövlət himninin ifası ilə başlanıb.

Sonra şəhidlərin xatirəsi bir dəqiqəlik sükutla yad edilib.

Biləsuvar Rayon İcra Hakimiyyətinin başçısı Mahir Quliyev biləsuvarlıların bütün dövrlərdə Vətənə, dövlətə sədaqət nümunələri göstərdiklərini, hərb tarixinə parlaq səhifələr yazdıqlarını vurğulayaraq qeyd edib ki, təkcə Qarabağ müharibəsində bu rayondan döyüşlərə yollanmış 122 gənc şəhidlik zirvəsinə ucalıb. Həmin gənclərdən bəziləri itkin düşüb və yaxud sağlamlığını itirib. Vaxtilə Biləsuvar qabaqcıl kənd təsərrüfatı rayonu kimi tanınırdısa, bu gün Mübariz İbrahimov kimi Milli Qəhrəmanlarla tanınır. Hazırda Silahlı Qüvvələrin bütün qoşun növlərində, cəbhə bölgələrindəki hərbi hissələrdə biləsuvarlı hərbi qulluqçular Vətən qarşısında əsgəri borclarını şərəf və vicdanla yerinə yetirirlər.

Müdafiə Nazirliyinin zabiti, polkovnik Abdulla Qurbani Azərbaycan Prezidentinin sərəncamını və müdafiə nazirinin əmrini mərasim iştirakçılarının nəzərinə çatdırıb.

Sonra medallar şəhidlərin ailələrinə təqdim edilib.

Döyüşçülər adından çıxış edən baş leytenant Rzayev şəhid ailələrini əmin edib ki, övladlarının qisası artıqlaması ilə alınıb və bundan sonra da alınacaq. Gənc zabit bildirib ki, xalqına, dövlətinə, Ali Baş Komandanına arxalanan Azərbaycan əsgəri işğal altında olan torpaqları azad etmək uğrunda müqəddəs savaşa hər an hazır və qadirdir.

Əsgər valideynləri göstərilən diqqət və qayğıya, övladlarının xatirələrini həmişə əziz tutduqlarına, onların Vətən qarşısında xidmətlərini yüksək qiymətləndirdiklərinə görə Azərbaycan Prezidenti, Silahlı Qüvvələrin Ali Baş Komandanı İlham Əliyevə və Müdafiə Nazirliyinin rəhbərliyinə minnətdarlıqlarını bildiriblər.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi