Yuxarı

Azərbaycanın ən yüksək zirvəsində yeni sərhəd zastavasının açılışı olub - FOTO

Sərhəd zastavasının xidməti ərazisi mürəkkəb relyefə və soyuq iqlim şəraitinə malikdir

Bakı. 5 fevral. REPORT.AZ/ Şəki Sərhəd Dəstəsində yeni inşa edilən “Laza” sərhəd zastavası kompleksi istifadəyə verilib. 

"Report"un məlumatına görə, Azərbaycanın ən yüksək dağ zirvəsi olan Bazardüzü istiqa­mətində yerləşən sərhəd zastavasının xidməti ərazisi mürəkkəb relyefə və soyuq iqlim şəraitinə malikdir. Dövlət sərhədlərinin mühafizəsi qış aylarında qalın qarla örtülən dağlıq ərazilərdə, şaxtalı-boranlı havada təşkil edilir. Yeni inşa olunan sərhəd zastavasında yaradılan şərait sərhədçilərə xidməti daha yüksək səviyyədə təşkil etməyə geniş imkanlar yaradacaq.

Yeni sərhəd zastavası kompleksinin açılışı münasibətilə keçirilən mərasimdə DSX-nin rəisi, Sərhəd Qoşunlarının komandanı general-polkovnik Elçin Quliyev çıxış edərək ümummilli lider Heydər Əliyevin milli inkişaf siyasətini qətiyyətlə davam etdirən Prezi­dent İlham Əliyevin Ali Baş Komandanlığı altında ardıcıl həyata keçirilən islahatlar sayəsində Azərbaycan Sərhəd Mühafizəsinin mükəmməl inkişaf yolu keçərək qarşıya qoyulan hər bir tapşırığı layiqincə yerinə yetirməyə qadir olan hərbi qurum səviyyəsinə yüksəlməsini xüsusi vurğulayaraq, son illər ərzində Azərbaycanda müasir sərhəd mühafizə infrastrukturunun formalaşması, bütün hərbi hissə və bölmələrdə yüksək xidmət və məişət şəraitinin yaradılması istiqamə­tində tədbirlərin uğurla davam etdirildiyini qeyd edib.

Tədbirdə iştirak edən Qəbələ Rayon İcra Hakimiyyətinin başçısı Səbuhi Abdullayev sərhədçiləri təbrik edərək onlara uğurlar arzulayıb.

Rəmzi lent kəsildikdən sonra sərhəd zastavasına baxış keçirilib.

Yeni eksperimental layihə üzrə tikilən sərhəd zastavasında xidmətin yük­sək səviyyədə təşkili və sərhədçilərin istirahəti üçün hər cür şərait yaradılıb. Zabit və gizir ailələri üçün inşa olunan mənzillər, müasir tələblərə cavab verən xüsusi təyinatlı otaqlar, yeməkxana, istirahət guşəsi, idman zalı, təlim şəhərciyi, mərkəzləşdirilmiş istilik və işıqlandırma sistemləri, hamam-camaşırxana lazımi avadanlıq və vasitələrlə təmin olunub, yol və səkilər asfaltlanıb, ərazidə abadlaşdırma işləri görülüb.

Tədbirin sonunda Sərhəd Qoşunlarının komandanı general-polkovnik Elçin Quliyev və qonaqlar şəxsi heyətlə birlikdə nahar ediblər.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi