Bakı. 2 mart. REPORT.AZ/ "Lerik rayonunda məktəb direktorunun qonşusunu bıçaqlaması faktı Təhsil Nazirliyi tərəfindən araşdırılır".
Bu barədə "Report"un sorğusuna cavab olaraq Təhsil Nazirliyindən bildirilib.
"Araşdırmalardan sonra baş verən hadisəyə rəsmi münasibət bildirəcəyik", - nazirlikdən deyilib.
Qeyd edək ki, Lerik rayonunda kənd məktəbinin direktoru işləyən Rəhimov Adil Yaqub oğlu qonşusu 36 yaşlı Seyid Baloğlan oğlu Qurbanovu bıçaqlayıb.
Çoxsaylı bıçaq zərbələri alan yaralı bu gün səhər Lənkəran Rayon Mərkəzi Xəstəxanasına (RMX) çatdırılıb. Sinə, kürək və qol nahiyələrində kəsilmiş-deşilmiş yaralar olan Seyid Qurbanova hemopnevmatoraks, yəni ağ ciyərlərin hava və qan kütləsi ilə dolması diaqnozu qoyularaq, dərhal cərrahiyə əməliyyatına alınıb. Onun vəziyyəti ağır qiymətləndirilir.
A.Rəhimov daha sonra qardaşının qəbri üstündə intihar edib.
Faktla bağlı hüquq-mühafizə orqanları araşdırma aparır.