Şəmkir. 17 yanvar. REPORT.AZ/ Şəmkir rayonunda taksi sürücüsü Babayev Namiq Əli oğlunu bıçaqlayan şəxs ona məxsus avtomobili qaçıraraq rayon ərazisində fəaliyyət göstərən avtomobil təmirxanalarının birinə satıb.
"Report" xəbər verir ki, hüquq-mühafizə orqanları tərəfindən aparılan əməliyyat axtarış tədbirləri nəticəsində qaçırılan avtomobil tapılıb. Bıçaqlayan şəxsin axtarışı isə davam etdirilir.
Faktla bağlı Şəmkir Rayon Polis Şöbəsində cinayət işi açılıb, araşdırma aparılır.
***22:42
Şəmkir rayonunda taksi sürücüsü sərnişini tərəfindən bıçaqlanıb.
"Report"un Qərb bürosunun məlumatına görə, hadisə axşam saatlarında rayonun Seyfəli kəndi ərazisində baş verib.
Belə ki, naməlum şəxs taksi kimi fəaliyyət göstərən "VAZ-2107" markalı avtomobilə əyləşərək sürücü, Gəncə şəhər sakini, 1958-ci il təvəllüdlü Babayev Namiq Əli oğluna onu Seyfəli kəndinə aparmasını deyib. Yolda sərnişin sürücünü bıçaqla hədələyərək avtomobili saxladıb və daha sonra onu bıçaqlayaraq N.Babayevin avtomobilini qaçıraraq oradan uzaqlaşıb.
Yaralı yaxınlıqdakı şəxslərin köməyi ilə xəstəxanaya yerləşdirilib. Həkimlər tərəfindən əməliyyat olunan sürücünün vəziyyətinin ağır olduğu bildirilir.
Faktla bağlı Şəmkir Rayon Polis Şöbəsində araşdırma aparılır.