Bakı. 22 yanvar. REPORT.AZ/ Axşam saatlarında Şamaxı rayonuna yağan qar səbəbindən magistral yolda avtomobillərin hərəkətində problemlər yaranıb.
"Report"un Şirvan bürosunun xəbərinə görə, Bakı-Şamaxı-Yevlax magistral yolunun Şamaxı rayonunun Muğanlı və Şərədil kəndlərindən keçən hissəsində hərəkət edən nəqliyyat vasitələri maneələrlə üzləşiblər.
Ərazidəki avtomobil yolunun enişli-yoxuşlu olması bəzi nəqliyyat vasitələrinin yolda qalmasına səbəb olub. Əraziyə "Azəravtoyol" ASC-nin Şamaxı və Ağsu rayon idarələrinin qartəmizləyən texnikaları cəlb edilib və yolların qardan təmizlənməsinə başlanılıb.
Hazırda avtomobillərin hərəkəti qismən bərpa olunub.