Rusiyada azərbaycanlı beynəlxalq axtarışa verilib

Bakı. 13 fevral. REPORT.AZ/ Qanunsuz spirtli içki istehsalı və satışında ittiham olunan, cinayətkar qrupun iştirakçısı olan azərbaycanlı Xaqani Paşayev Rusiyada beynəlxalq axtarışa verilib. 

Bu barədə "Report" Rusiya KİV-inə istinadən xəbər verir.

Belə ki, Omsk şəhərinin Oktyabrski rayon məhkəməsi Azərbaycan, Qırğızıstan və Özbəkistan əsilli 5 nəfəri - Xaqani Paşayev, Elyar Mahmudov, Elcan Osmanov, Şavkat Umarov və Muxamedali Akmataliulunu bir qrup şəxs tərəfindən qanunsuz spirtli içki istehsalı və satışında günahkar bilərək, cəzalarını ümumi rejimli cəzaçəkmə koloniyasında çəkməklə 1,5 ildən 3 ilədək müddətə azadlıqdan məhrum edib.

X.Paşayev gizləndiyindən beynəlxalq axtarışa verilib.

Qeyd edək ki, bu qruplaşma 2016-cı ildə su və istehlak üçün yararlı olmayan texniki spirtdən alkoqollu məhsul hazırlayaraq onu üzərində məşhur brendlərin etiketləri olan şüşələrə doldurub və aşağı qiymətə topdan satıb.