Yuxarı

​Rusiya Orxan Zeynalovun Azərbaycana ekstradisiya olunacağına dair xəbərləri təkzib edib

İndiyədək Ədliyyə Nazirliyinə vəsatət daxil olmayıb

Bakı. 1 oktyabr. REPORT.AZ/ Rusiya Ədliyyə Nazirliyinin mətbuat xidməti Moskva sakini Yeqor Şerbakovu qətlə yetirdiyi iddia olunan və 17 il müddətinə azadlıqdan məhrum edilən Orxan Zeynalovun Azərbaycana təhvil veriləcəyinə dair məlumatları təkzib edib.

"Report" "İnterfax"a istinadən xəbər verir ki, məlumata görə, vəsatət daxil olacağı təqdirdə o, azadlıqdan məhrum edilmiş şəxslərin cəzasını sonradan çəkmək üçün təhvil verilməsinə dair Konvensiyasının müddəalarına və Rusiya Cinayət-Prosessual Məcəlləsinə müvafiq qaydada nəzərdən keçiriləcək.

"İndiyədək Rusiyanın Ədliyyə Nazirliyinə Orxan Zeynalovun Rusiyadan Azərbaycana təhvil verilməsinə dair vəsatət daxil olmayıb. Bununla əlaqədar Rusiya Ədliyyə Nazirliyində sözügedən məsələyə baxılmır",— deyə agentlik idarənin məlumatını sitat gətirir.

Bir neçə gün əvvəl Azərbaycan mətbuatında Orxan Zeynalovun atasına istinadən onun Azərbaycana ekstradisiya olunacağı ilə bağlı sənədlərin hazırlanması barədə məlumat dərc olunub.

Sözügedən qətlin 10 oktyabr 2013-cü ildə törədildiyi iddia edilir.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi