Yuxarı
    Bağlamaq

    Qulu Məhərrəmlinin İTV əməkdaşına qarşı verdiyi şikayət əsasında məhkəmə başlayıb

    Məhkəmənin baxış iclası iyulun 25-nə təyin edilib

    Bakı. 13 iyul. REPORT.AZ/ Bakı Apellyasiya Məhkəməsində professor, əməkdar jurnalist Qulu Məhərrəmlinin İctimai Televiziyanın (İTV) İnformasiya Departamentinin direktoru Rauf Rəcəbovla bağlı verdiyi apellyasiya şikayəti üzrə ilkin hazırlıq iclası başlayıb.

    Bu barədə "Report"a Q.Məhərrəmlinin nümayəndəsi Nicat Gözəlov məlumat verib.

    Onun sözlərinə görə, hakim Vaqif Mursaqulovun sədrliyi ilə keçirilən prosesdə hər iki tərəfin nümayəndələrinin order və etibarnamələri məhkəməyə təqdim edilib.

    Məhkəmənin baxış iclası iyulun 25-nə təyin olunub.

    Qeyd edək ki, Q.Məhərrəmli R.Rəcəbovu məhkəməyə verib. O, İTV-nin əməkdaşına qarşı xüsusi ittiham qaydasında iddia ərizəsi ilə Səbail Rayon Məhkəməsinə müraciət edib. Q.Məhərrəmli R.Rəcəbovun mətbuatda onun barəsində yazdığı məqaləyə görə Cinayət Məcəlləsinin 147 və 148-ci (böhtan və təhqir) maddələri ilə cəzalandırılmasını istəyib. Səbail Rayon Məhkəməsinin qərarına əsasən, iş aidiyyəti üzrə baxılması üçün Nəsimi Rayon Məhkəməsinə göndərilib. Nəsimi Rayon Məhkəməsinin hakimi Elman İsayev isə şikayəti icraata götürməyib. O, iddianı əsassız sayıb. Həmin qərardan narazı qalan Q.Məhərrəmli apellyasiya şikayəti verib.

    Bundan başqa, Q.Məhərrəmli R.Rəcəbovla bağlı mülki qaydada Səbail Rayon Məhkəməsinə müraciət edib. O, şərəf və layaqətin, işgüzar nüfuzun qorunması, təkzib verilməklə üzr istənilməsi və zərərin ödənilməsi barədə tələb irəli sürüb. Məhkəmə prosesində R.Rəcəbov mülki işin ərazi aidiyyəti üzrə Bakı şəhəri Yasamal Rayon Məhkəməsinə göndərilməsinə dair vəsatət verib. Lakin məhkəmə vəsatəti təmin etməyib. İTV-nin əməkdaşı həmin qərardan apellyasiya şikayəti verib. Bakı Apellyasiya Məhkəməsi iddianın aidiyyəti üzrə düzgün verilidiyi və Səbail Rayon Məhkəməsində baxılmalı olduğu haqda qərar qəbul edib. 

    Xatırladaq ki, Azərbaycan Televiziya və Radio Verilişləri Qapalı Səhmdar Cəmiyyətinin (ASC) sədri Arif Alışanov və Q.Məhərrəmli arasında narazılıq jurnalistin fevral ayında Azərbaycanda televiziyanın kütləvi yayımına başlamasının 60 illiyi ilə bağlı verdiyi müsahibədən sonra yaranıb. Bundan sonra A.Alışanov Q.Məhərrəmlini məhkəməyə verib. O, jurnalistdən mülki qaydada dəymiş ziyanın ödənilməsini istəyib. Bununla bağlı A.Alışanov Nəsimi Rayon Məhkəməsinə müraciət edərək, Q.Məhərrəmlidən 100 min manat pul tələb edib. A.Alışanovun ərizəsində həmin pulu Körpələr Evinə verəcəyini göstərib.

    Hazırda Nəsimi Rayon Məhkəməsində iş üzrə icraat dayandırılıb. Həmçinin, A.Alışanov Yasamal Rayon Məhkəməsinə müraciət edərək, Q.Məhərrəmlinin cinayət məsuliyyətinə cəlb olunması barədə xüsusi ittiham qaydasında şikayət verib.Yasamal Rayon Məhkəməsində A.Alışanovun Q.Məhərrəmliyə qarşı xüsusi ittiham qaydasında verdiyi şikayət üzrə məhkəmədə linqivistik ekspertiza təyin olunub.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi