Qardaşını öldürən Bakı sakininə hökm oxunub

Bakı Ağır Cinayətlər Məhkəməsində qardaşını qətlə yetirməkdə təqsirləndirilən Ağaməli Kərimovun cinayət işi üzrə məhkəmə prosesi keçirilib.

"Report"un xəbərinə görə, hakim Mahmud Ağalarovun sədrlik etdiyi prosesdə dövlət ittihamçısı təqsirləndirilənə 17 il azadlıqdan məhrumetmə cəzası verilməsini təklif edib.

Məhkəmə müşavirədən sonra A.Kərimovun 9 il 6 ay müddətinə azadlıqdan məhrum edilməsi barədə hökmü elan edib.

Qeyd edək ki, hadisə ötən ilin oktyabr ayında Bakıda baş verib. Suraxanı rayonunun Hövsan qəsəbəsində yaşayan Ağaməli Kərimov evində münaqişə zəminində qardaşı Ədili bıçaqla qətlə yetirib.

Polis və prokurorluq orqanları əməkdaşlarının birgə keçirdikləri istintaq və əməliyyat tədbirləri nəticəsində qəsdən adam öldürməkdə şübhəli bilinən A.Kərimov saxlanılıb.

Ona Cinayət Məcəlləsinin 120.2.4 (xüsusi amansızlıqla adamöldürmə) maddəsi ilə ittiham verilib.