Yuxarı
    Bağlamaq

    Özünü BDU-nun müəllimi kimi təqdim edərək dələduzluq törədən qadının cəzası azaldılıb

    Hakim Hüseyn Nəbiyevin sədrliyi ilə keçirilən prosesdə qərar elan olunub

    Bakı. 12 may. REPORT.AZ/ Sumqayıt Apellyasiya Məhkəməsində dələduzluqda təqsirləndirilən Lalə Məmmədovanın barəsində olan hökmdən verilən apellyasiya şikayəti üzrə məhkəmə iclası başa çatıb.

    "Report"un məlumatına görə, hakim Hüseyn Nəbiyevin sədrliyi ilə keçirilən prosesdə qərar elan olunub.

    Qərara əsasən, birinci instansiya məhkəməsinin çıxardığı hökm dəyişdirilib. Belə ki, onun 3 il 6 ay müddətinə azadlıqdan məhrumetmə cəzası 3 ilə endirilib.

    Qeyd edək ki, ittiham aktına əsasən, L.Məmmədova tamah niyyəti ilə etibardan sui-istifadə etmə və aldatma yolu ilə özgənin əmlakını ələ keçirərək zərərçəkmiş şəxsə xeyli miqdarda ziyan vurmaqla dələduzluq cinayəti törədib.

    Belə ki, o, tamah niyyəti ilə 2015-ci ilin iyul ayında Yusibov Azər Məhəmməd oğluna özünü Bakı Dövələt Universitetinin (BDU) müəllimi və tələbə qəbulu üzrə səlahiyyətli şəxs kimi təqdim edib. L.Məmmədova A.Yusibovu aldadıb, etibarından sui-istifadə etməklə onun qızı Nuranə Yusibovanı BDU-nun Geologiya və xəritəçəkmə fakültəsinə tələbə kimi qəbul etdirəcəyinə söz verib. O, bu məqsədlə zərərçəkmişdən 2015-ci ilin iyul ayının ortalarında A.Yusibovun Xırdalan şəhəri, Quşçuluq yaşayış massivi ərazisindəki evində 5 min manat məbləğində pul alıb. Daha sonra L.Məmmədova verdiyi vədə əməl etməyib.

    L.Məmmədova Cinayət Məcəlləsinin 178.2.2-ci (dələduzluq, xeyli miqdarda ziyan vurmaqla törədildikdə) maddəsi ilə ittiham olunub.

    Abşeron Rayon Məhkəməsinin hökmü ilə o, 3 il 6 ay müddətinə azadlıqdan məhrum edilib. Hökmdən narazı qalan məhkum və zərərçəkmiş apellyasiya şikayəti verib.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi