Yuxarı
    Bağlamaq

    Ombudsman Aparatının əməkdaşları Cəlilabad Polis Şöbəsində saxlanılanlara baş çəkiblər

    Saxlanılan şəxslər şəraitdən və müəssisə əməkdaşlarının onlarla rəftarından narazılıq etməyib

    Bakı. 7 iyul. REPORT.AZ/ Ombudsmanın Milli Preventiv Qrupunun (MPQ) üzvləri Cəlilabad rayon Polis Şöbəsinin müvəqqəti saxlama yerinə (MSY) əvvəlcədən xəbərdarlıq etmədən planlı baxış keçiriblər. 

    Ombudsman Aparatının mətbuat xidmətindən "Report"a verilən məlumata görə, baxışda məqsəd saxlanılma şəraitinin və rəftarın araşdırılması, "Həbs yerlərində saxlanılan şəxslərin hüquq və azadlıqlarının təmin edilməsi haqqında" qanuna və "Müvəqqəti saxlama yerlərinin daxili intizam Qaydaları"na müvafiq şəkildə saxlanılan şəxslərin hüquqlarının təmin olunması vəziyyətinin, o cümlədən sənədləşmənin aparılması vəziyyətinin öyrənilməsi olub.

    Saxlanma şəraitinin araşdırılması məqsədilə MSY-nin müvafiq otaqlarına baxış keçirilib, havaların isti keçməsi ilə əlaqədar havalandırma və soyutma sisteminin çalışdığı müşahidə edilib, qidalanma, içməli, isti və soyuq su təminatı, tibbi yardım, gəzinti, görüş, sovqat və telefon danışıqları, kameradan çıxarılma ilə bağlı sənədləşmə yoxlanılıb. Habelə Ombudsman Aparatının əməkdaşları həmin müəssisədə 16 nəfər saxlanılan şəxsi fərdi qaydada qəbul edib, onlarla təkbətək söhbətlər aparılıb.

    MSY-də saxlanılan şəxslər şəraitdən və müəssisə əməkdaşlarının onlarla rəftarından narazılıq etməyib, onlara hüquqları və ombudsmanın səlahiyyətləri izah olunub, hər birinə hüquqi məsləhətlər verilib.

    Həmin müəssisə rəhbərliyinə milli və beynəlxalq qanunvericiliyə, o cümlədən "Müvəqqəti saxlama yerlərinin daxili intizam Qaydaları"na uyğun şəkildə sənədləşmənin təkmilləşdirilməsi və çatışmazlıqların aradan qaldırılıması ilə bağlı müvafiq tövsiyələr verilib.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi