Niyazi Bayramov koronavirus pandemiyası ilə bağlı maarifləndirmə tədbirlərinə qoşulub

Gəncə şəhərində koronavirus (COVID-19) pandemiyası ilə bağlı maarifləndirmə tədbirləri davam etdirilir.

"Report"un Qərb Mərkəzinin məlumatına görə, Gəncə Şəhər İcra Hakimiyyətinin başçısı Niyazi Bayramov maarifləndirmə tədbirlərinə qoşulub.

O, Gəncədə fəaliyyət göstərən ərzaq mağazalarına baş çəkib, buradakı mövcud vəziyyət və xidmətlərlə maraqlanıb. Şəhər rəhbəri Mərkəzi Poçtda və bir sıra apteklərdə də olub. O, yarana biləcək süni qiymət artımı və digər neqativ hallarla bağlı qanuna müvafiq qaydada tədbir görüləcəyini obyekt sahiblərinin diqqətinə çatdırıb. N.Bayramov sahibkarlar, satıcı və alıcılarla maarifləndirici söhbət aparıb, kassaların, habelə bankomatların önündə növbə gözləyərkən ara məsafəsi saxlamağın zəruriliyini bir daha xatıladıb.

N.Bayramov Nazirlər Kabineti yanında Operativ Qərargah tərəfindən qəbul edilən xüsusi karantin rejimi qaydalarına məhəl qoymayaraq küçəyə çıxan sakinlərlə də söhbət edib. Xüsusilə yaşı 65-dən yuxarı olan şəhər sakinlərinə növbəti dəfə xəbərdarlıq olunub. O bildirib ki, hazırkı şəraitdə yalnız dövlət tərəfindən keçirilən tədbirlər deyil, vətəndaşlarımızın, bütün cəmiyyətin sosial məsuliyyətdən irəli gələn addımları, görülən işlərə dəstəyi vacibdir. Bu səbəbdən də Nazirlər Kabineti yanında Operativ Qərargahın bütün tövsiyə, təklif və qərarları qeyd-şərtsiz icra olunmalıdır. İcra başçısı zərurət qarşısında qalaraq evdən çıxan sakinlərə ehtiyatlı davranmağı, qoruyucu maska və əlcəklərdən istifadə etməyi tövsiyə edib.

N.Bayramov “Şəhər, rayon icra hakimiyyətləri və Gəncə Şəhər Baş Polis İdarəsi əməkdaşlarından ibarət mobil qruplar”ın üzvləri ilə də görüşüb. O, iş başında olan və şəhərin Cavad xan küçəsində maarifləndirmə tədbirlərini həyata keçirən mobil qrupun üzvlərinə öz təklif və tövsiyələrini verib.