​Neftçala sakini həmyerlisini bıçaqlayıb

Bakı. 26 oktyabr. REPORT.AZ/ Neftçala rayonunda bıçaqlanma hadisəsi baş verib. "Report"un məlumatına görə, hadisə bu gün axşam saatlarında rayonun Qaçaqkənd kəndində qeydə alınıb. 

Belə ki, kənd sakini, 1988-ci il təvəllüdlü Fərrux Allahverdi oğlu Səmədov mübahisə zəminində həmkəndlisi Səbuhi adlı şəxs tərəfindən döş qəfəsindən 3 bıçaq zərbəsi alıb. Yaralı yaxınları tərəfindən Salyan Rayon Mərkəzi Xəstəxanasına çatdırılıb. Cərrahiyyə şöbəsinə qaldırılan Fərrux Səmədov əməliyyat olunub. Onun vəziyyətinin ağır olduğu bildirilir.

Faktla bağlı Neftçala Rayon Polis Şöbəsində araşdırma aparılır.