Yuxarı

​Nardaran hadisələri ilə bağlı həbs edilən Nuhbala Rəhimova hökm oxunub

O, 1 il 6 ay müddətinə azadlıqdan məhrum edilib

Bakı. 27 may. REPORT.AZ/ Sabunçu Rayon Məhkəməsində Nardaran hadisələri ilə bağlı həbs edilən Hacı Nuhbala Rəhimovun cinayət işi üzrə məhkəmə başa çatıb.

"Report"un məlumatına görə, sonuncu iclasda hökm oxunub.

Məhkəmənin hökmü ilə N.Rəhimov 1 il 6 ay müddətinə azadlıqdan məhrum edilib.

Qeyd edək ki, özünü Nardarandakı Rəhimə xanım ziyarətgahının Hüseyniyyə məscidinin axundu kimi təqdim edən N.Rəhimov ötən il dekabrın 7-də Nardaran qəsəbəsində saxlanılaraq, Sabunçu Rayon Polis İdarəsinə aparılıb. Sabunçu Rayon Məhkəməsinin qərarı ilə onun barəsində 12 sutkalıq inzibati həbs qərarı çıxarılıb. Daha sonra N.Rəhimov haqqındakı inzibati həbs tədbiri 4 aylıq həbs qətimkan tədbirinə dəyişdirilib və o, Nardaran hadisələri ilə bağlı təqsirli bilinərək başlanmış cinayət işinin istintaqına cəlb edilib.

Xatırladaq ki, Daxili İşlər Nazirliyi 2015-ci il noyabrın 26-da Bakı şəhərinin Nardaran qəsəbəsində xüsusi əməliyyat keçirib. Əməliyyat zamanı polis əməkdaşlarına silahlı müqavimət göstərilərək avtomat silahlardan atəş açılıb, əl qumbarası atılıb. Hücum edənlərin davamlı atəşinə cavab olaraq xüsusi əməliyyat qrupu tərəfindən xidməti silahdan istifadə edilməklə cinayətkar dəstənin 4 üzvü məhv edilib, daha bir neçə nəfəri yaralanıb. Əməliyyatın keçirildiyi ərazidə silahlı cinayətkar dəstənin tərəfdarlarının çoxalmasına baxmayaraq, polis işçiləri öz xidməti vəzifələrini sonadək mərdliklə yerinə yetirib, 2 əməkdaş qəhrəmancasına həlak olub. Hadisə yerindən maddi sübut kimi, xeyli sayda avtomat silah, əl qumbarası, soyuq silahlar və s. götürülüb. Cinayətkar dəstənin Taleh Bağırov başda olmaqla, 14 üzvü saxlanılaraq istintaqa təqdim edilib. T.Bağırov barəsində həbs qətimkan tədbiri seçilib.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi