Yuxarı

Misir Azərbaycanda korrupsiyaya qarşı mübarizə sahəsində əldə edilən nailiyyətləri yüksək qiymətləndirib

Misir nümayəndə heyəti Baş prokuror yanında Korrupsiyaya qarşı Mübarizə Baş İdarəsində olub

Bakı. 26 may. REPORT.AZ/ Azərbaycanda səfərdə olan Misir Ərəb Respublikasının korrupsiyaya qarşı mübarizə sahəsində ixtisaslaşmış İnzibati Nəzarət Qurumunun İstintaq İdarəsinin rəisi Hany Mohamed Loay Hassaneinin rəhbərlik etdiyi nümayəndə heyəti mayın 26-da Baş prokuror yanında Korrupsiyaya qarşı Mübarizə Baş İdarəsində olub.

Qurumun mətbuat xidmətindən “Report”a verilən məlumata görə, baş prokurorun müavini - Baş prokuror yanında Korrupsiyaya qarşı Mübarizə Baş İdarəsinin rəisi Kamran Əliyev Azərbaycanda korrupsiyaya qarşı mübarizə sahəsində həyata keçirilən qanunvericilik və institusional, cinayət təqibi və qabaqlayıcı tədbirlər barədə, habelə Baş İdarənin strukturu və fəaliyyət istiqamətlərinə dair ətraflı məlumat verib.

Görüşdə Baş İdarə rəisi korrupsiyaya qarşı mübarizədə beynəlxalq əməkdaşlığın əhəmiyyətini, təcrübə mübadiləsinin vacibliyini nəzərə almaqla bu sahədə ixtisaslaşmış beynəlxalq təşkilatlarla əlaqələrin qurulmasına və daha da inkişaf etdirilməsinə daim önəm verildiyini diqqətə çatdırıb.

Sonra qonaqlar milli memarlıq üslubunda və müasir standartlar səviyyəsində inşa edilmiş Baş prokuror yanında Korrupsiyaya qarşı Mübarizə Baş İdarəsinin inzibati binasında müxtəlif səviyyəli konfransların və tədbirlərin keçirilməsi üçün nəzərdə tutulmuş iclas zalları, normativ-hüquqi aktlarla zəngin və digər dövlət orqanlarının elektron kitabxanalarına çıxışla təmin edilmiş kitabxana, kriminalistika otağı, müasir proqram təminatı ilə təchiz edilmiş 161 saylı “Qaynar xətt” əlaqə mərkəzi, dövlət orqanlarının məlumat bazalarına çıxışı olan informasiya-kommunikasiya şəbəkəsi və əməliyyatların idarə edilməsi mərkəzi və vətəndaşların qəbulu otağı ilə yaxından tanış olublar.

Baş İdarədə yaradılmış yüksək iş şəraitindən məmnunluğunu ifadə edən Hany Mohamed Loay Hassanein ölkədə korrupsiyaya qarşı mübarizə sahəsində əldə edilmiş nailiyyətləri yüksək qiymətləndirib.

Görüş zamanı qonaqlara korrupsiyaya qarşı mübarizə sahəsində ixtisaslaşmış beynəlxalq qurumlar, habelə digər ölkələrin müvafiq qurumları ilə yaradılan işgüzar münasibətlər barədə geniş məlumat verilib. Görülən işlər böyük marağa səbəb olub və iki ölkə arasında bu sahədə qarşılıqlı əməkdaşlığın inkişaf etdirilməsinə dair fikir mübadiləsi aparılıb.

Qonaqlara korrupsiyaya qarşı mübarizə sahəsində ölkədə həyata keçirilən tədbirlər, Baş prokuror yanında Korrupsiyaya qarşı Mübarizə Baş İdarəsinin fəaliyyətini əks etdirən buklet, bülleten və kitabçalar təqdim edilib.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi