Metronun ötən gün açılışı olan stansiyasının eskalatorlarında problem yaranıb

Bakı. 8 iyun. REPORT.AZ/ Metronun ötən gün açılışı olan "Sahil" stansiyasında eskalatorların fəaliyyətində fasilə yaranıb.

"Report" xəbər verir ki, gün ərzində bir neçə dəfə enən eskalatorların hərəkəti dayanıb.

"Bakı Metropoliteni"QSC-nin mətbuat xidmətinin rəisi vəzifəsini müvəqqəti icra edən Bəxtiyar Məmmədov "Report"a açıqlamasında bildirib ki, hadisə səhər saatlarında baş verib:

"Səhər saat 10 radələrində "Sahil" stansiyasındakı 3 və 4 saylı (enən) eskalatorlarda 3 dəfə hadisə baş verib. Bu səbəbdən də eskalatorların avtobloklanması baş verib. Hər dəfə fasilə 30-40 saniyə çəkib. Yeni eskalatorların fəaliyyəti tam avtomatlaşdırıldığı üçün avtobloklanmanın olması normaldır".

B.Məmmədov deyib ki, hadisənin səbəbləri araşdırılacaq:

"Bu gecə həmin hadisənin başvermə səbəbləri araşdırılacaq və tam aradan qaldırılacaq".

Qeyd edək ki, metronun "Sahil" stansiyası 2017-ci ilin avqustun 21-də təmirə bağlanıb. Ötən gün isə Azərbaycan Prezidenti İlham Əliyev metronun bu stansiyasının təmir və yenidənqurmadan sonra açılışını edib.