Yuxarı

Mərhum İlhamə Quliyevanın sabiq köməkçisinin həyat yoldaşı məhkəmədə ifadə verib

Məhkəmənin növbəti iclası noyabrın 8-nə təyin edilib

Bakı. 1 noyabr. REPORT.AZ/ Bu gün Bakı Ağır Cinayətlər Məhkəməsində mərhum xalq artisti İlhamə Quliyevanın sabiq köməkçisi Mehriban Hüseynovanın cinayət işi üzrə məhkəmə prosesi davam etdirilib.

"Report"un məlumatına görə, hakim Səbuhi Hüseynovun sədrliyi ilə keçirilən prosesdə şahid qisimində M.Hüseynovanın həyat yoldaşı Tofiq Hüseynov ifadə verib.

O, İlhamə Quliyeva və onun oğlunun evlərinə basqın etdiyini deyib: "Onlar Mehribanın evdən şuba oğurladıqlarını dedilər. Daha sonra İlhamə xanım mənə zəng edib hədələyirdi. Gecə Mehriban evə gələndə halı pis idi".

Məhkəmənin növbəti iclası noyabrın 8-nə təyin edilib.

Qeyd edək ki, xalq artisti İ.Quliyevanın sabiq köməkçisi M.Hüseynova 2015-ci il oktyabr ayının 21-də həbs edilib. Onun barəsində Cinayət Məcəlləsinin 29,180.3.2-ci (soyğunçuluğa cəhd, zərərçəkmiş şəxsə külli miqdarda ziyan vurmaqla törədildikdə) maddəsi ilə cinayət işi başlanıb. 2016-cı il fevral ayının 13-də Səbail Rayon Məhkəməsində M.Hüseynova barəsində seçilmiş həbs qətimkan tədbirinin müddəti üç ay uzadılıb.

Xatırladaq ki, İ.Quliyeva 2016-cı il fevral ayının 25-də səhər saatlarında 73 yaşında dünyasını dəyişib.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi