Məhkəmə İlhamə Quliyevanın oğlunun adı keçən dələduzluq işi ilə bağlı qərarı elan edib

Bakı. 9 mart. REPORT.AZ/ Bakı Apellyasiya Məhkəməsində Bakıda bir neçə nəfərə qarşı dələduzluq və rüşvət verməyə təhrik etməkdə təqsirləndirilən Etibar Hüseynovun barəsində olan hökmdən verilən apellyasiya şikayəti üzrə məhkəmə prosesi başa çatıb.

"Report"un xəbərinə görə, hakim Sahibxan Mirzəyevin sədrliyi ilə keçirilən iclasda qərar elan olunub.

Qərara əsasən, E.Hüseynovun apellyasiya şikayəti təmin edilməyib, birinci instansiya məhkəməsinin çıxardığı hökm dəyişdirilmədən saxlanılıb.

İttiham aktına əsasən, E.Hüseynov özünü Vəkillər Kollegiyasının üzvü kimi təqdim edərək bir neçə nəfərə qarşı dələduzluq edib.

Təqsirləndirilən şəxslərə qarşı Cinayət Məcəlləsinin 178.3.2 (dələduzluq; külli miqdarda törədildikdə), 310 (vəzifəli şəxsin səlahiyyətlərini mənimsəmə) və 32,312-ci (rüşvət verməyə təhrik etmə; aktiv rüşvətxorluq) maddələri ilə ittiham irəli sürülüb.

E.Hüseynov məhkəmənin çağırışlarına məhəl qoyulmadığı üçün onun barəsində axtarış elan olunub və cinayət işi ayrıca icraata ayrılıb. Daha əvvəl məhkəmənin çıxardığı hökmə əsasən, Ç.İsmayılova şərti cəza verilib və məhkəmə zalında azadlığa buraxılıb.

Xatırladaq ki, məhkəmədə ifadə verən zərərçəkmiş Z.Məmmədova bildirib ki, təqsirləndirilən şəxsi mərhum İlhamə Quliyevanın oğlu Orxan Nadirov vasitəsilə tanıyıb. Hazırda O.Nadirov da dələduzluqda ittiham edilir və cinayət işinə Binəqədi Rayon Məhkəməsində baxılır.

Bakı Ağır Cinayətlər Məhkəməsinin hökmü ilə 8 il müddətinə azadlıqdan məhrum edilib. Hökmdən narazı qalan məhkum apellyasiya şikayəti verib. Hökmdən narazı qalan məhkum apellyasiya şikayəti verib.