“İdeal”ın keçmiş sahibinin məhkəməsində şahid dindirilib

“İdeal”ın keçmiş sahibinin məhkəməsində şahid dindirilib Bakı Ağır Cinayətlər Məhkəməsində “İdeal” mağazalar şəbəkəsinin keçmiş sahibi İlqar İsmayılovun cinayət işi üzrə məhkəmənin növbəti prosesi keçirilib.
Hadisə
230
7 Sentyabr , 2021 13:30
“İdeal”ın keçmiş sahibinin məhkəməsində şahid dindirilib

Bakı Ağır Cinayətlər Məhkəməsində “İdeal” mağazalar şəbəkəsinin keçmiş sahibi İlqar İsmayılovun cinayət işi üzrə məhkəmənin növbəti prosesi keçirilib.

"Report"un xəbərinə görə, hakim Əli Məmmədovun sədrliyi ilə keçirilən prosesdə şahid qismində “İdeal Kompani”nin mühasibi işləmiş Samirə Quliyeva dindirilib.

S.Quliyeva suallara cavab olaraq bildirib ki, Fuad Şahvəliyevi tanıyır: “İlqar İsmayılova şirkətin kassasından verilən məbləğlər barədə hesabatlar həm də Fuad Şahvəliyevə verilirdi. İstənilən məbləğin məxaric olunmasından həm İlqar İsmayılovun, həm də Fuad Şahvəliyevin xəbəri olurdu”.

Daha əvvəlki iclaslarda F.Şahvəliyevin “İdeal Kompani”nin digər ortağını təmsil edən şəxs olmasına dair məhkəmədə fikirlər səsləndirilmişdi.

Şahidin sözlərinə görə, təqsirləndirilən şəxsin adına olan, lakin əslində şirkətə mədaxil olunan kreditlər olub ki, həmin kreditlərin aylıq ödənişləri üçün şirkətin xəzinəsindən İ.İsmayılova vəsait ayrılıb.

Müdafiə tərəfinin sualına cavab verən S.Quliyeva deyib ki, Həbib Qarayev şirkətdə təsərrüfat məsələlərinə cavabdeh və şirkətə nağd pulların mədaxil-məxaric edilməsində səlahiyyətli şəxs olub.

Şahid müdafiə tərəfinin ona təqdim etdiyi, İ.İsmayılov tərəfindən şirkətin kassasına ümumilikdə 5 milyona qədər vəsait mədaxil edilməsinə dair kassa mədaxil qəbzlərində olan imzasını təsdiqləyib və bildirib ki, həqiqətən də bu mədaxillər olub.

Bundan əlavə S.Quliyeva mədaxil və məxaric əməliyyatları ilə bağlı özündə təqsirləndirilən şəxsin şirkətə bir milyon beş yüz min, altmış səkkiz min dollar və sair məbləğlər mədaxil etməsi ilə bağlı İ.İsmayılov və F.Şahvəliyevlə elektron yazışmalardan çıxarışları təsdiqləyib.

O qeyd edib ki, şirkətin xəzinəsindən edilən bütün əməliyyatlar barədə günün sonunda hesabatlar hazırlanırdı və növbəti gün səhər İ.İsmayılova, F.Şahvəliyevə və maliyyə məsələlərindən digər vəzifəli şəxslərə göndərilirdi.

Şahid bildirib ki, İ.İsmayılovun adından şirkətin xəzinəsinə böyük məbləğli mədaxillər olurdu. O, bankdan İ.İsmayılovun adına götürülmüş və məbləği bir milyondan yuxarı olan kreditin götürülməsini və bankın inkassatoru tərəfindən nağd şəkildə “İdeal Kompani”nin xəzinəsinə mədaxil edildiyini xatırladığını deyib.

S.Quliyeva əlavə edib ki, həmin kreditlər üzrə aylıq ödəniş qrafikləri olduqda ödənişlər şirkətin kassasından ödənilib: “Səhv etmirəmsə, həmin kredit üzrə aylıq ödəniş 36 min manat idi”.

Məhkəmədə müdafiə tərəfi elan edib ki, İ.İsmayılova verilən ittihamda isə həmin məbləğlər mənimsəmə kimi qeyd edilib: “Guya həmin məbləğləri İlqar İsmayılov şəxsi kreditlərin ödənişinə sərf edib”.

S.Quliyeva söyləyib ki, İ.İsmayılovla yanaşı digər təsisçiyə də ildə iki dəfə böyük məbləğlərdə, dəyəri milyonlarla ölçülən divident ödənilib.

Növbəti proses sentyabrın 20-nə təyin edilib.

Qeyd edək ki, İ.İsmayılov 2011-2017-ci illərdə tutduğu vəzifəsindən sui-istifadə edərək 680 min manata yaxın məbləğdə pul vəsaitini mənimsəməkdə təqsirləndirilir.

Ona Cinayət Məcəlləsinin 179.3.2-ci və 308.2-ci maddələri ilə ittiham elan edilib, Binəqədi Rayon Məhkəməsinin qərarı ilə barəsində həbs qətimkan tədbiri seçilib.

Son xəbərlər

Orphus sistemi