Həmkəndlisinə ağır xəsarət yetirən şəxsə hökm oxunub

Bakı Ağır Cinayətlər Məhkəməsində qəsdən sağlamlığa ağır zərər vurmaqda təqsirləndirilən Sahib Zeynalovun cinayət işi üzrə məhkəmə iclası keçirilib.

"Report"un xəbərinə görə, hakim Eldar Mikayılovun sədrliyi ilə keçirilən prosesdə hökm oxunub. 

Hökmə əsasən, S.Zeynalov 6 il 6 ay müddətinə azadlıqdan məhrum edilib.

O, Cinayət Məcəlləsinin 126.2.4-cü (ümumi təhlükəli üsulla, xuliqanlıq niyyətilə qəsdən sağlamlığa ağır zərərvurma) maddəsi ilə təqsirli bilinib.

Hadisə Şamaxı rayonunun Dağ-Bağırlı kəndində vaş verib. İttihama görə, Sahib Zeynalov dava zamanı həmkəndlisi və qohumu olan Həbib Qafarova küt alətlə ağır xəsarətlər yetirib. Davada 10 nəfərdən artıq şəxs iştirak edib. Kütləvi davanın səbəbi isə illər əvvəl baş verən qətl hadisəsi olub. Həbib Qafarovun qardaşı 2008-ci ildə məclislərin birində mübahisə zəminində Sahib Zeynalovun qardaşını qətlə yetirib. Bu hadisədən sonra ailələr arasında düşmənçilik münasibəti yaranıb. Qafarovlar ailəsi kəndi tərk etmək məcburiyyətində qalıb və 10 il sonra kəndə qayıdıb. Zeynalovlar Qafarovların həyətinə gələrək onlardan kəndi tərk etmələrini istəyib, istədikləri cavabı almayan zaman mübahisə və kütləvi dava başlayıb. Dava zamanı Həbib Qafarov və oğlu döyülüb. Ciddi xəsarəti isə Həbib Qafarov alıb.

Bu hadisədən sonra davada iştirak edən şəxslər barəsində Cinayət Məcəlləsinin 128.1-ci (Qəsdən sağlamlığa yüngül zərərvurma) maddəsi ilə cinayət işi açılıb. Həmin şəxslər cərimələnib. Yalnız Sahib Zeynalov barəsində iş ayrıca icraata verilib və ona daha ağır maddə ilə ittiham irəli sürülüb.