Hacı Məmmədov dəfn olunub - YENİLƏNİB

Bakı. 5 dekabr. REPORT.AZ/ Vəkil Afət Qazıyeva "Report"a bildirib ki, H.Məmmədovun nəşi bu gün səhər saatlarında ailəsinə təhvil verilib: "Ailəsi də Hacı Məmmədovu dəfn edib. Amma mən onun hansı qəbirstanlıqda dəfn edildiyini demək istəmirəm. Bu barədə ailəsi mətbuata açıqlama vermək istəməyib".

*** 12:09

Ədliyyə Nazirliyi Penitensiar Xidmətinin İxtisaslaşdırılmış müalicə müəssisəsində inthar etmiş DİN-in Cinayət Axtarış Baş İdarəsinin keçmiş baş əməliyyat müvəkkili Hacı Məmmədovun meyiti Patoloji Anatomiya Bürosunda yarılaraq müayinə olunub.

"Report”un məlumatına görə, daha sonra meyit H.Məmmədovun yaxınlarına verilib.

Xatırladaq ki, H.Məmmədov keçmiş Milli Təhlükəsizlik Nazirliyinin 10 mart 2005-ci il tarixdə keçirdiyi “Qara kəmər” əməliyyatı ilə həbs edilib. 19 yanvar 2007-ci ildə Ağır Cinayətlərə Dair İşlər üzrə Məhkəmənin qərarına əsasən, ömürlük həbs cəzası alıb. Onun intiharı ilə bağlı Bakı Şəhər Prokurorluğunda Cinayət Məcəlləsinin 125-ci (Özünü öldürmə həddinə çatdırma) maddəsi ilə cinayət işi başlanıb.