Gürcüstanda azərbaycanlının fermasında kütləvi tələfatla bağlı araşdırmaya başlanıb

Gürcüstanın Milli Qida Agentliyi Marneuli rayonunun Qızılhacılı kəndində fermer İlqar Qaxacova məxsus təsərrüfatda mal-qara arasında baş vermiş kütləvi tələfatla bağlı araşdırmaya başlayıb.

“Report”un Gürcüstan bürosu xəbər verir ki, Agentliyin Baytarlıq Departamentinin nümayəndələri laborator araşdırma üçün nümunələr götürüblər.

Laboratoriya araşdırmasından sonra mal-qaranın kütləvi tələf olmasının səbəbi müəyyən olunacaq. İlkin qiymətləndirmələrə əsasən, mal-qaranın zəhərlənməsi hər hansı bir infeksiya və ya təhlükəli xəstəliklə bağlı deyil.

Kütləvi tələfata mal-qara sahibinin dərman preparatını baytar həkimin nəzarəti olmadan düzgün dozada hazırlamadığı ehtimal olunur.

Milli Qida Agentliyindən kütləvi zəhərlənmə nəticəsində 54 baş mal-qaranın tələf olduğu bildirilib.