Gəncədə bir ailənin 3 üzvünü avtomobil vurub

Gəncə. 5 noyabr. REPORT.AZ/ Gəncə şəhərində bir ailənin 3 üzvünü maşın vurub. 

"Report"un Qərb bürosunun məlumatına görə, hadisə şəhərin Abbas Səhhət küçəsində baş verib.

Belə ki, Samux rayonunun Hacıallı kənd sakinləri - 1957-ci il təvəllüdlü Tanrıverdi Əhməd oğlu Musayev, onun həyat yoldaşı, 1957-ci il təvəllüdlü Maya Xəlil qızı Musayeva və gəlinləri, 1992-ci il təvəllüdlü Pəri Fəxrəddin qızı Musayevanı yolu keçmək istəyərkən avtomobil vurub. Yaralılar xəstəxanaya yerləşdirilib. Onlardan birinin vəziyyəti kafi, digərlərinki isə normal qiymətləndirilir.

Qəzanı törədən sürücü saxlanılıb.

Faktla bağlı araşdırma aparılır.