Yuxarı

FHN-in Bakı Regional Mərkəzi "dəyirmi masa" keçirib

Tədbirdə bina və qurğuların texniki təhlükəsizliyi sahəsində aşkar edilən pozuntular barədə məlumat verilib

Bakı. 27 yanvar. REPORT.AZ/ Bu gün Fövqəladə Hallar Nazirliyinin (FHN) Bakı Regional Mərkəzində "İstismarda olan bina və qurğuların texniki təhlükəsizliyinin 2014-cü ildə aparılmış monitorinqinin nəticələri və qarşıda duran vəzifələr" mövzusunda "dəyirmi masa" keçirilib. 

"Report"un nazirliyin rəsmi saytına istinadən verdiyi məlumata görə, tədbirdə FHN Aparatının, Dövlət Yanğından Mühafizə və Dövlət Yanğın Nəzarəti xidmətlərinin, Tikintidə Təhlükəsizliyə Nəzarət Dövlət Agentliyinin, Bakı və Sumqayıt Regional mərkəzlərinin əməkdaşları, Bakı Regional Mərkəzi nəzdində fəaliyyət göstərən Əlaqələndirmə Komissiyasının Bakı şəhərinin bütün rayonlarının icra hakimiyyətlərini təmsil edən üzvləri, Bakı Şəhər İcra Hakimiyyətinin səlahiyyətli nümayəndəsi iştirak edib.

Çıxış edənlər Mərkəzdə fəaliyyət göstərən monitorinq qrupu tərəfindən hazırlanan hesabatda öz əksini tapan bina və qurğuların texniki təhlükəsizliyi sahəsində aşkar edilən pozuntular barədə məlumat verib, hər bir rayon üzrə bu sahədə görülən işlərin vəziyyəti təhlil edilib və təqdimat şəklində tədbir iştirakçılarına nümayiş olunub.

Təqdimatda həmçinin Mərkəzə "112" Çevik reaksiya idarəsindən daxil olmuş müraciətlərin Bakı şəhərinin rayonları üzrə statistikası və məzmun göstəriciləri də nəzərə çatdırılıb.

Tədbirdə rayon icra hakimiyyətlərinin nümayəndələri çıxış edərək mövcud problemlər barədə danışıb və onların aradan qaldırılması istiqamətində öz təkliflərini veriblər. Bundan əlavə, Mərkəzin monitorinq qrupunun səmərəli fəaliyyəti qeyd edilib və gələcəkdə də sıx əməkdaşlıq əlaqələrinin saxlanılmasının vacibliyi bildirilib.

İnteraktiv müzakirələr şəraitində keçirilmiş "dəyirmi masa" zamanı səslənən problemlər və onların aradan qaldırılması məqsədilə qeyd olunan təkliflər ümumiləşdirilib və həyata keçirmək üçün tövsiyə olunub.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi