Yuxarı

Əcnəbilərin və vətəndaşlığı olmayan şəxslərin Azərbaycan hüdudlarından kənara çıxarılması qaydaları sərtləşdirilib

Mövcud qanunvericilikdə tələb daha yumşaq formada qoyulub

Bakı. 16 dekabr. REPORT.AZ/ Azərbaycanda əcnəbilərin və vətəndaşlığı olmayan şəxslərin ölkə hüdudlarından kənara çıxarılması qaydaları sərtləşdirilir. “Report” xəbər verir ki, bununla bağlı Azərbaycan Miqrasiya Məcəlləsində dəyişikliklər edilib.

Dəyişikliklər barədə məlumat verən Milli Məclisin Hüquq siyasəti və dövlət quruculuğu komitəsinin sədri Əli Hüseynli bildirib ki, Məcəllənin 80.2 maddəsinə təklif edilən dəyişikliyə əsasən, əcnəbilər və ya vətəndaşlığı olmayan şəxslər ölkə ərazisini tərk etməkdən boyun qaçırdıqda və ya belə boyun qaçırmanı ehtimal etməyə kifayət qədər əsaslar olduqda, onlar müvafiq icra hakimiyyəti orqanının müraciəti əsasında məhkəmənin qərarı ilə bu Məcəllədə müəyyən edilmiş qaydada və müddətdə müvafiq icra hakimiyyəti orqanının qanunsuz miqrantların saxlanması mərkəzlərində yerləşdirilir.

Mövcud qanunvericilikdə isə tələb daha yumşaq formada qoyulur. Yəni mövcud qanunvericilikdə eyni maddədə göstərilir ki, Azərbaycanın ərazisini tərk etməkdən boyun qaçıran əcnəbilər və ya vətəndaşlığı olmayan şəxslər müvafiq icra hakimiyyəti orqanının müraciəti əsasında məhkəmənin qərarına əsasən tutulur və Azərbaycan Respublikasının hüdudlarından kənara çıxarılanadək qanunla müəyyən olunmuş qaydada müvafiq icra hakimiyyəti orqanının qanunsuz miqrantların saxlanması mərkəzinə yerləşdirilir.

Yəni yeni təklif edilən dəyişikliklərdə yalnız konkret olaraq boyun qaçırma zamanı deyil, eyni zamanda boyun qaçırmanı ehtimal etməyə kifayət qədər əsaslar olduqda əcnəbilər və vətəndaşlığı olmayan şəxslər saxlanılır.

Qeyd edək ki, dəyişikliklər səsə qoyularaq qəbul edilib.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi