Yuxarı

Daşkəsəndə kişinin vətəndaş nikahında yaşadığı qadını qətlə yetirməsi ilə bağlı bəzi təfərrüatlar məlum olub - YENİLƏNİB-2 - TƏFƏRRÜAT

Daşkəsəndə kişinin vətəndaş nikahında yaşadığı qadını qətlə yetirməsi ilə bağlı bəzi təfərrüatlar məlum olub - YENİLƏNİB-2 - TƏFƏRRÜAT
Vətəndaş nikahında yaşamış hər iki şəxs öz rəsmi ailəsindən boşanıb

Daşkəsən. 25 fevral. REPORT.AZ/ Daşkəsən rayonunda baş verən qətl hadisəsi ilə bağlı cinayət işi başlanılıb. 

"Report"un Qərb bürosunun məlumatına görə, 1978-ci il təvəllüdlü Bağırov Qorxmaz Şamil oğlu sürücülüklə məşğuldur. Özünə məxsus "ZİL" markalı avtomobillə yük daşıyaraq dolanır. Ailəsi və 15-16 yaşlı bir qızı və bir oğlu var. Təxminən bir ay əvvəl həyat yoldaşı məhkəmə yolu ilə ondan boşanıb. Buna kişinin başqa qadınla vətəndaş nikahında yaşaması, eyni zamanda öz xalası qızı üçün 3500 manat məbləğində kredit götürməsi və həmin krediti xalası qızının yox, məhz Q.Bağırovun öz uşaqlarının boğazından kəsərək ödəməsi səbəb olub.

Bildirilir ki, o, xalası qızı adına olan krediti qeyri-rəsmi yaşadığı qadına görə götürüb. Q.Bağırovun 2017-ci ilin yanvar ayında sərxoş vəziyyətdə ictimai qaydanı pozduğuna görə 15 gün həbsdə olduğu da deyilir.

Faktla bağlı Daşkəsən Rayon Prokurorluğunda 120.1 ("Qəsdən adam öldürmə" ) maddəsi ilə cinayət işi açılıb, istintaq gedir.


*** 11:58

Daşkəsən. 25 fevral. REPORT.AZ/ Daşkəsən rayonunda baş vermiş qətl hadisəsi ilə bağlı bəzi təfərrüatlar məlum olub.

"Report"un Qərb bürosunun məlumatına görə, Əhmədli kəndində qətlə yetirilən eyniadlı kəndin 1975-ci il təvəllüdlü sakini Abbasova Mahizər Məhəmməd qızı əvvəllər bir dəfə ailəli olub və evlilikdən bir qızı və bir oğlu var.

Qadının qızı ərdədir və bir uşaq anasıdır. Oğlu isə 15 yaşındadır və hazırda Əhmədli kənd orta məktəbində oxuyur.

M.Abbasova rayonun 1978-ci il təvəllüdlü Çanaqçı kənd sakini Qorxmaz Bağırova görə öz ərindən boşanıb və illərdir özündən 3 yaş böyük olan Q.Bağırovla vətəndaş nikahında yaşayır. Eyni zamanda, Q.Bağırovun Çanaqçı kəndində rəsmi ailəsi və övladları var. Lakin məlumata görə isə, artıq o da, həyat yoldaşından boşanıb.

Kənd sakinlərinin "Report"a verdiyi məlumata görə, qadının meyitini oğlu aşkar edib. Həmin gecə oğlu qonşuluqda olan bacısıgildə olub. Qadın oğluna həmin gün evə gəlməyəcəyini və tək qorxmaması üçün bacısıgilə getməsini istəyib. Səhər uşaq öz evlərinə qayıdanda anasını ölmüş vəziyyətdə görüb. Baş nahiyəsindən küt alətlə qətlə yetirilmiş qadının əvvəllər kiminləsə bir münasibətinin olmadığı bildirilir.

Hazırda hüquq-mühafizə orqanları hadisəni törətməkdə şübhəli bilinən Q.Bağırovun saxlanılması istiqamətində əməliyyat-axtarış tədbirləri həyata keçirirlər.


***10:04

Daşkəsən. 25 fevral. REPORT.AZ/ Daşkəsən rayonunda qətl hadisəsi baş verib.

"Report"un Qərb bürosunun məlumatına görə, 1982-ci il təvəllüdlü Əhmədli kənd sakini Abbasova Mahizər Məhəmməd qızı qeyri-rəsmi nikahda yaşadığı 1978-ci il təvəllüdlü Bəşirov Qorxmaz Şəmil oğlu tərəfindən qətlə yetirilib.

Məlumata görə o, hadisəni qadının baş nahiyəsinə küt alətlə zərbə endirərək törədib və hadisə yerindən qaçıb.

Bildirilir ki, M.Abbasova bir neçə il əvvəl rəsmi nikahda olduğu həyat yoldaşından boşanıb, bir oğlu və bir qızı var.

Faktla bağlı Daşkəsən Rayon Prokurorluğunda 120.1 ("Qəsdən adam öldürmə") maddəsi ilə cinayət işi açılıb, araşdırma aparılır.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Son xəbərlər



Orphus sistemi