Beyləqanda qadını öldürən şəxsin daha bir qətl törətdiyi məlum olub

Bakı. 9 aprel. REPORT.AZ/ Polis və prokurorluq orqanları əməkdaşlarının birgə keçirdikləri təxirəsalınmaz istintaq və əməliyyat-axtarış tədbirləri ilə aprelin 3-də Beyləqan şəhərində şəhər sakini Ramilə Əsədovanı tamah məqsədilə qətlə yetirməkdə şübhəli bilindiyinə görə tutulmuş şəhər sakini Rövşən Nəsirovun ətrafında aparılan əməliyyat tədbirləri ilə onun törətdiyi digər ağır cinayətin də üstü açılıb.

Daxili İşlər Nazirliyinin (DİN) Mətbuat xidmətindən “Report”a verilən məlumata görə, istintaq və əməliyyat-axtarış tədbirləri ilə R.Nəsirovun ötən il oktyabr ayının 19-da şəhər sakini Kənan Məhərrəmovu Beyləqan şəhərindəki yaşadığı evə apararaq bıçaqla qətlə yetirdiyi, sonra isə təmiri başa çatmamış otaqda torpağa basdırması müəyyən edilib.

K.Məhərrəmovun meyiti eksqumasiya edilib. Araşdırmalar davam etdirilir.

Qeyd edək ki, keçən il K.Məhərromvun yaxınları onun itkin düşməsi barədə polisə məlumat verib. Yaxınları bildirib ki, Kənan Məhərrəmov ruhi xəstə olsa da, özünü idarə edə bilir.