Baş həkimin məhkəməsində FHN-in idarə rəisinin müavini dindirilib

Baş həkimin məhkəməsində FHN-in idarə rəisinin müavini dindirilib Bakı Ağır Cinayətlər Məhkəməsində Fövqəladə Hallar Nazirliyinin (FHN) Tibb Xidmətinin Modul Tipli Hospitalının baş həkimi İmran Ağayev, müəssisənin vəzifəli şəxsləri olan Rüfət Vəlizadə, Taleh İmanlı və Qulu Orucovun cinayət işi üzrə məhkəmə prosesi keçir
Hadisə
176
9 Dekabr , 2021 16:38
Baş həkimin məhkəməsində FHN-in idarə rəisinin müavini dindirilib
İmran Ağayev

Bu gün Bakı Ağır Cinayətlər Məhkəməsində Fövqəladə Hallar Nazirliyinin (FHN) Tibb Xidmətinin Modul Tipli Hospitalının baş həkimi İmran Ağayev, müəssisənin vəzifəli şəxsləri olan Rüfət Vəlizadə, Taleh İmanlı və Qulu Orucovun cinayət işi üzrə növbəti məhkəmə prosesi keçirilib.

“Report” xəbər verir ki, hakim Faiq Qəniyevin sədrliyi ilə keçirilən iclasda şahid qismində Namiq Həbibov ifadə verib.

O, FHN-in Tibb Xidmətinin Modul Tipli Hospitalına yerləşdirilmək üçün pul vermədiyini deyib: “Sadəcə dostlarım təcili yardıma 50-100 manat şirinlik veriblər. Təqsirləndirilən şəxslərdən hər hansı bir şikayətim yoxdur”.

Digər şahid Azər Süleymanlı qeyd edib ki, anasının hospitala yerləşdirilməsi üçün 1 000 manat pul verib: “Pulu dostum Rüstəmə vermişəm. Rüstəmin dediyinə görə, pulu Emin adlı şəxsə verib”.

Daha sonra şahid qismində FHN əməkdaşı, Fövqəladə halların xəbərdar edilməsi və daxili təhlükəsizlik Baş idarəsinin rəis müavini Füzuli Əhmədov dindirilib.

O, koronavirusa yoluxduğu üçün nazirliyin nəzdində olan hospitala müraciət etdiyini deyib: "Əvvəlcə atam koronavirusa yoluxdu, onu evdə müalicə edirdik. Amma həyatını xilas etmək mümkün olmadı. Atamın yanına tez-tez baş çəkdiyim üçün özüm də xəstələndim. Daha sonra FHN-in Tibb Xidmətinin Modul Tipli Hospitalına müraciət edim. Ora gedəndə məni 3 ağır xəstə ilə birlikdə palataya yerləşdirdilər. Hospitalda çox narahat idim. Hay-küy salandan sonra məni hospitalın 14-cü korpusuna köçürdülər. Orada müalicə olundum və sağaldım”.

FHN rəsmisi deyib ki, hospitalda müalicə olunan zaman ondan heç kim pul tələb etməyib.

Növbəti proses dekabrın 13-də davam etdiriləcək.

Qeyd edək ki, istintaq zamanı İmran Ağayevin həmin vəzifədə işləyərkən müəssisənin vəzifəli şəxsləri olan Rüfət Vəlizadə, Taleh İmanlı və Qulu Orucov ilə qabaqcadan əlbir olaraq hospitalın “VİP korpus”larına yerləşdirilərək daha yüksək səviyyəli tibbi və sair təminatla təchiz edilməsi müqabilində 6 nəfər şəxsdən ümumilikdə 10 min 500 manat pul vəsaitini almasına, həmçinin yenidən əmək müqaviləsinin bağlanması yolu ilə həmin müəssisədə fəaliyyətlərini davam etdirmələrinə görə hospitalın ayrı-ayrı əməkdaşlarından cəmi 5 min manat məbləğində pul vəsaitini rüşvət qismində istəməsinə əsaslı şübhələr müəyyən edilib.

İmran Ağayevin fasiləsiz şəkildə müəssisəyə qəbul olunmalarına dair görüntü yaratmaqla COVID-19 pandemiyasından əziyyət çəkən 140 nəfər xəstənin özünün təsisçisi və direktoru olduğu “Medi Style” MMC-nə məxsus Təcili Tibbi Yardım avtomobilləri vasitəsi ilə Modul Tipli Hospitala aparılması müqabilində həmin şəxslərdən xidmət haqqı qismində ümumilikdə cəmi 51 min 600 manat məbləğdə pul vəsaitini almasına əsaslı şübhələr müəyyən edilib.

Həmçinin, İmran Ağayevin müxtəlif tarixlərdə verdiyi COVID-19 test nəticəsi pozitiv çıxmış Rüfət Vəlizadənin (müəssisənin vəzifəli şəxsi) mütəmadi olaraq sərbəst şəkildə tibb müəssisəsinin inzibati binasını tərk edərək sərbəst şəraitdə hərəkət etməsinə şərait yaratmasına, həmin hərəkətləri ilə epidemiya əleyhinə, sanitariya-gigiyena və karantin rejimi qaydalarını pozaraq xəstəliyin yayılması ilə bağlı ağır nəticələrə səbəb olan real təhlükə yaratmasına əsaslı şübhələr müəyyən edilib.

İş üzrə toplanan sübutlar əsasında İmran Ağayev və digərlərinə müvafiq olaraq Cinayət Məcəlləsinin 139-1.2 (epidemiya əleyhinə rejimin, sanitariya-gigiyena və ya karantin rejimlərinin pozulması ağır nəticələrə səbəb olduqda), 308.2 (vəzifə səlahiyyətlərindən sui-istifadə etmə ağır nəticələrə səbəb olduqda), 311.3.1, 311.3.2 (rüşvət alma qabaqcadan əlbir olan bir qrup şəxs tərəfindən təkrar törədildikdə) maddələri ilə yekun ittiham elan edilib.

Son xəbərlər

Orphus sistemi