Bankın filial müdirinin cəzası azaldılıb

Ali Məhkəmədə vəzifə səlahiyyətlərindən sui-istifadə etmədə təqsirləndirilən Eldar İmanovun barəsində olan hökmdən verilən kassasiya şikayəti üzrə məhkəmə iclası başa çatıb.

"Report"un xəbərinə görə, hakim Fərhad Kərimovun sədrliyi ilə keçirilən prosesdə qərar elan olunub.

Qərara əsasən, E.İmanovun kassasiya şikayəti qismən təmin edilib.

Belə ki, onun ittiham olunduğu Cinayət Məcəlləsinin (CM) 308.2-ci (vəzifə səlahiyyətlərindən sui-istifadə) maddəsi həmin Məcəllənin 308.1-ci maddəsinə tövsif edilib. E.İmanovun 3 il 6 ay müddətinə azadlıqdan məhrumetmə cəzası 2 il 6 aya endirilib.

İttiham aktına əsasən, E.İmanov 2007-2015-ci illər arasında banklardan birinin Şirvan filialının müdiri vəzifəsində işləyərkən, bankın digər vəzifəli şəxsi ilə birgə vəzifə səlahiyyətlərindən sui-istifadə edib.

Belə ki, o, ümumilikdə 1 milyon 143 min 541 manat kredit vəsaitini qanunsuz ayırıb, çoxsaylı kreditlərin ayrılmasına görə isə əsassız olaraq 8451 manat məbləğində əmək haqqına əlavə bonus alıb.

E.İmanov qeyd olunan qanunsuz hərəkətləri ilə  işlədiyi bankın hüquqlarına və qanuni mənafelərinə mühüm zərər vurub.

Lənkəran Ağır Cinayətlər Məhkəməsinin hökmü ilə o, 4 il 6 ay müddətinə azadlıqdan məhrum edilib. Hökmdən narazı qalan məhkum apellyasiya şikayəti verib. Şirvan Apellyasiya Məhkəməsi E.İmanovun cəzasını 3 il 6 aya endirib.