Yuxarı

Azərbaycanda yol qəzalarının üçdə biri şənbə-bazar günləri baş verir

Ötən il qayda pozan sürücülərə 88,5 milyon manat məbləğində cərimə tətbiq edilib

Bakı. 23 fevral. REPORT.AZ/  Azərbaycanın avtomobil yollarında 2015-ci ildə 2220 yol-nəqliyyat hadisəsi baş verib və bu hadisələr nəticəsində 3159 nəfər zərər çəkib. "Report"un məlumatına görə, bu barədə Dövlət Statistika Komitəsi (DSK) məlumat yayıb.

2014-cü ilə nisbətən hadisələrin sayı 15.7 faiz, zərərçəkənlərin sayı isə 16.9 faiz azalıb. Zərərçəkənlərin 2265 nəfəri müxtəlif dərəcəli bədən xəsarəti alıb, 894 nəfəri isə həlak olub.

Yol-nəqliyyat hadisələrinin 1934-ü yaşayış məntəqələrində baş verib, nəticədə 2710 nəfər zərər çəkib, onlardan 587 nəfər həlak olub, 2123 nəfər isə yaralanıb. 2014-cü illə müqayisədə ölənlərin sayı 25.7 faiz, yaralananların sayı isə 13.6 faiz azalıb.

Bütün yol-nəqliyyat hadisələrinin 41.6 faizi nəqliyyat vasitələrinin və piyadaların iştirakı ilə, 22.5 faizi bir nəqliyyat vasitəsinin iştirakı ilə, 35.9 faizi bir neçə nəqliyyat vasitəsinin iştirakı ilə baş verib və 2014-cü ilə nisbətən hadisələrin sayı müvafiq olaraq, 6.6 faiz, 23.6 faiz və 19.7 faiz azalıb.

Yol-nəqliyyat hadisələrinin 43.4 faizi gündüz, 38 faizi gecə, 18.6 faizi isə toran vaxtı baş verib. Hadisələrin 30.2 faizi həftənin şənbə və bazar günlərinə təsadüf edib.

2015-ci İl ərzində sərxoş sürücülər tərəfindən nəqliyyat vasitələrinin idarə olunması zamanı ölüm və ya bədən xəsarətləri ilə nəticələnən 55 yol-nəqliyyat hadisəsi baş verib, nəticədə 97 nəfər zərər çəkib. Belə hadisələrin 92.7 faizi minik avtomobillərinin sürücüləri tərəfindən törədilib. Ötən il ərzində yol-hərəkəti qaydalarını pozan 2.5 milyon və ya 2014-cü illə müqayisədə 7.5 faiz çox sürücü aşkarlanıb. Xətaların 32.3 faizi yolda hərəkət sürətinin aşılması, 17.4 faizi dayanma, durma və ya parklanma qaydalarının pozulması, 8.1 faizi təhlükəsizlik kəmərini bağlamadan nəqliyyat vasitəsinin idarə olunması, 6 faizi yol ayrıcını keçmə, 5.4 faizi piyadalar və yol hərəkətinin başqa iştirakçıları tərəfindən yol hərəkəti qaydalarının pozulması, 4.5 faizi yol nişanlarının və ya yolların hərəkət hissəsinin işarələrinin tələblərinə riayət edilməməsi, qalan hissəsi isə digər səbəblər üzrə aşkarlanıb. Qaydaların pozulmasına görə sürücülərə 88.5 milyon manat məbləğində cərimələr tətbiq olunub. 

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi