Yuxarı

​Azərbaycanda saxlanılan nurçular azadlığa buraxılıb

Apellyasiya şikayəti üzrə məhkəmə başa çatıb

Bakı. 19 aprel. REPORT.AZ/ Bakı Apellyasiya Məhkəməsində Azərbaycanda həbs edilən nurçular barəsində olan hökmdən verilmiş apellyasiya şikayəti üzrə məhkəmə başa çatıb.

"Report"un məlumat görə, hakim Qail Məmmədovun sədrliyi ilə keçirilən prosesdə qərar elan olunub.

Qərara əsasən, Rəvan Səbzəliyevin cəzası başa çatdığı üçün məhkəmə zalından azadlığa buraxılıb. Zəkəriyyə Məmmədov və Şahin Həsənov barəsində 2 il yarım sınaq müddəti olmaqla azadlığa buraxlıb. Digər iki şəxs - Eldəniz Hacıyev və İsmayıl Məmmədovun cəzası 5 ildən 3 ilə endirilib

Qeyd edək ki, 2013-cü ilin aprel ayında hüquq-mühafizə orqanları əməkdaşlarının Bakının Xıdır Mustafayev küçəsində yerləşən mənzillərin birində apardıqları axtarış zamanı evdə toplantı keçirən "nurçu" təriqətinin 41 üzvü saxlanılıb. Həmin şəxslərin bir hissəsindən izahat alınıb və sərbəst buraxılıb.

Səbail Rayon Məhkəməsinin qərarı ilə Hacıyev Eldəniz Balamət oğlu, Məmmədov İsmayıl İsax oğlu və Səbzəliyev Rəvan Həkim oğlu barələrində həbs qətimkan tədbiri seçilib. Sonradan onların barəsində seçilmiş həbs qətimkan tədbiri ev dustaqlığı ilə əvəz olunub. Yasamal Rayon Məhkəməsində təqsirləndirilən şəxslər - Eldəniz Hacıyev, İsmayıl Məmmədov, onun qardaşı Zəkəriyyə Məmmədov, Şahin Həsənovun hər biri 5 il, Rəvan Səbzəliyev isə 2 il müddətinə azadlıqdan məhrum edilib. Onların hər biri məhkəmə zalında həbs edilib.

Təqsirləndirilən şəxslər Cinayət Məcəlləsinin 167-2.2.1-ci (qanunsuz olaraq dini təyinatlı ədəbiyyatı, audio və video materialları, mal və məmulatları və dini məzmunlu başqa məlumat materiallarını istehsal etmə, idxal etmə, satma və ya yayma, qabaqcadan əlbir olan bir qrup şəxs və ya mütəşəkkil dəstə tərəfindən törədildikdə) və 168.2-ci (dini ayinlərin icrası adı altında vətəndaşların hüquqlarına qəsd etmə, bu Məcəllənin 168.1-ci maddəsində nəzərdə tutulmuş əməllərin törədilməsinə yetkinlik yaşına çatmayanları cəlb etmə) maddələri ilə ittiham olunub.

Hökmdən narazı qalan həmin şəxslər apellyasiya şikayətləri veriblər. Təqsirləndirilən şəxslər Bakı Apellyasiya Məhkəməsində hakim Qail Məmmədovun sədrliyi ilə keçirilən prosesin ilkin qərarından kassasiya şikayəti ilə Ali Məhkəməyə müraciət ediblər. Məhkəmə nurçuların kassasiya şikayətini təmin etməyib. İş yenidən baxılması üçün Bakı Apellyasiya Məhkəməsinə göndərilib.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi