"Atletiko"nun futbolçusu: "Qələbə qazanmaq istəyirdik, amma alınmadı"

Bakı. 1 noyabr. REPORT.AZ/ "Bu oyunun bizim üçün finala bərabər olduğunu bilirdik. Qələbə qazanmaq istəyirdik, amma alınmadı".

"Report"un məlumatına görə, bunu "Atletiko"nun futbolçusu Anxel Korrea İspaniyada "Qarabağ"la 1:1 hesablı heç-heçə etdikləri Çempionlar Liqasının qrup mərhələsinin IV tur matçından sonra jurnalistlərə açıqlamasında deyib.

22 yaşlı yarımmüdafiəçi bildirib ki, vəziyyəti düzəltmək üçün öz üzərilərində işləməyi davam etdirməlidirlər:

"Rəqib bura asanlıqla məğlub olmaq üçün gəlməmişdi. Çoxlu qol imkanı yaratdıq. Lakin əvvəlki uğurlar bu dəfə bizdən yan keçdi. İlk yarını elə də yüksək səviyyədə keçirmədik. İkinci hissədə daha yaxşı oynadıq. Lakin qələbə qazana bilmədik. Vəziyyətin yaxşılaşdırılması istiqamətində çalışmalıyıq".

Qol vəziyyətləri yaratmalarına baxmayaraq, bəxtlərinin gətirmədiyini deyən Korreanın fikrincə, məyusluğa əsas yoxdur:

"Daha cəsarətlə çalışmalı, hələ də itməyən şansımızdan yararlanmağa çalışmalı, sonadək vuruşmalıyıq".