Astarada elektrik təsərrüfatı qəzalı vəziyyətdədir

Astara rayonunda elektrik təsərrüfatı qəzalı vəziyyətdədir.

“Report”un Cənub Mərkəzinin məlumatına görə, rayonun Şiyəkəran kəndi ərazisində yüksək gərginlikli elektrik naqilləri qırılaraq yolun kənarına və ya mal-qaranın örüş sahələrində yola düşür.

Kənd sakinləri yüksək gərginlikli elektrik naqillərinin tez-tez qırılaraq yerə düşməsinin insan ölümü ilə nəticələnməsindən ehtiyat edərək aidiyyəti qurumlara dəfələrlə müraciət ediblər. 

Kənd sakini Şaiq Təyyar oğlu Heydərova məxsus fermer təsərrüfatında olan naxırı örüşə apararkən yüksək gərginlikli naqil qırılaraq yola düşüb. Nəticədə naxırda olan 3 baş iribuynuzlu mal-qara tələf olub. Xoşbəxtlikdən naxırı örüşə aparan Ş.Heydərov özü təhlükədən yayına bilib.

Kənd ərazisindəki elektrik təsərrüfatının qəzalı vəziyyətinin təhlükə mənbəyi olması barədə sakinlər dəfələrlə şəbəkə rəhbərliyinə xəbərdarlıq etsələr də, heç bir tədbir görülməyib. İstismar müddətini çoxdan başa vurmuş elektrik naqillərinin yerlə məsafəsi çox azdır. Bir çox yerlərdə naqillər ağacların arasından keçir. Külək əsən kimi belə təhlükəli vəziyyət yaranır.

Ş.Heydərovun sözlərinə görə, ona ümumilikdə 5-6 min manat dəyərində ziyan dəyib. O, aidiyyəti qurumların səhlənkarlığı üzündən ona dəyən ziyanla bağlı Daxili İşlər Nazirliyinin "102" Xidməti-Zəng Mərkəzinə məlumat verib. 

"Report"un əldə etdiyi məlumata görə, zərərçəkən Astara Elektrik Şəbəkəsinə dəvət olunaraq ona dəyən ziyanın ödəniləcəyi bildirilib.