Bakıda arvadını öldürmək istəyən şəxsin kassasiya şikayəti təmin edilməyib

Ali Məhkəmədə xüsusi amansızlıqla öldürmək istəyən Seymur Soltanovun barəsində olan hökmdən verilən kassasiya şikayəti üzrə məhkəmə iclası başa çatıb.

"Report"un xəbərinə görə, hakim Hafiz Nəsibovun sədrliyi ilə keçirilən prosesdə qərar elan olunub.

Qərara əsasən, S.Soltanovun kassasiya şikayəti təmin edilməyib.

Qeyd edək ki, S.Soltanov 2016-cı il iyunun 8-də Bakı şəhəri, Yeni Günəşli qəsəbəsində həyat yoldaşı Cəmilə Soltanovanı bıçaqlayıb. O, polis bölməsinə gələrək cinayət əməlini etiraf edib.

Araşdırmaya başlayan polis əməkdaşlarına məlum olub ki, yaralanan qadın 3 saylı Klinik Xəstəxanasına çatdırılıb və onun həyatını xilas etmək mümkün olub.

Bakı Ağır Cinayətlər Məhkəməsinin hökmü ilə S.Soltanov 11 il 3 ay müddətinə azadlıqdan məhrumetmə cəzasına məhkum olunub. Hökmdən məhkum apellyasiya şikayəti verib. Bakı Apellyasiya Məhkəməsi şikayəti təmin etməyib.