Yuxarı
    Bağlamaq

    Tağı Əhmədov Akif Çovdarovun məhkəməsində ifadə verib: "Verdiyim pulu tələb edirəm" - YENİLƏNİB-3

    Tağı Əhmədov, düz danış© Report.az

    Bakı. 21 iyun. REPORT.AZ/ Günün ikinci yarısında keçirilən prosesdə T.Əhmədovun oğlu Ruslan Əhmədov suallara cavab verib. "Report"un xəbərinə görə, o, pulu əmisi oğlu Əhmədov Əli ilə birlikdə A.Çovdarova verdiyini söyləyib.

    Daha sonra vəkil Cavid Rzazadə vəsatət verib. O, həmin tarixə aid Ruslan Əhmədov, Əhmədov Əli, A.Çovdarov və onun sürücüsünün mobil telefonlarının anten məlumatlarının təqdim edilməsini istəyib.

    Məhkəmə vəsatətə münasibət bildirməyərək, müzakirəyə çıxarmayıb.

    İclasda A.Çovdarov biznesmen İlqar Budaqovun dinlənilməsi epizodu üzrə dindirilib. O, İ.Budaqovun telefonlarının dinlənilməsi üçün məhkəmə qərarı olduğunu bildirib: "Hər şey qanun çərçivəsində baş verib".

    Daha sonra A.Çovdarov məhkəmədə lətifə danışıb.

    Məhkəmənin növbəti iclası iyulun 3-nə təyin edilib.


    *** saat 15:10

    Bakı. 21 iyun. REPORT.AZ/ Prosesdən sonra A.Çovdarovun vəkili Sadiq Rəsulov jurnalistlərə açıqlamasında bildirib ki, T.Əhmədov dindirilərkən müdafiəçilərin ona ünvanlanan suallarından yayınıb.

    "Report"un xəbərinə görə, S.Rəsulov bildirib ki, T.Əhmədov məhkəmədə ziddiyyətli ifadələr verib: "Akif Çovdarov da Tağı Əhmədovun prosesdə qalmasını və ona suallar vermək istədiyini dedi. Hakim bunu təmin etmədi. Daha sonra biz Tağı Əhmədovdan 44 illik əmək haqqısı dediyi 3 milyon manat məbləğin mənbəyini soruşmaq istədik. Lakin hakim buna imkan vermədi. Mən 2006-cı ildən Tağı Əhmədovun işlədiyi müddətdə onun illik əmək haqqısı haqda çıxarış almışam. Tağı Əhmədovun qazancı illik maaşı 20-25 min manat olub. Bu da heç bir halda 3 milyon etmir".

    Vəkil S.Rəsulov bildirib ki, anket məlumatlarında T.Əhmədovun həmin vaxt o ərazidə olmadığı bəlli olub: "Bu barədə Dövlət Sərhəd Xidmətinə sorğu verdim. Sorğuya əsasən, martın 26-da Tağı Əhmədov ölkədə olmayıb. O, həmin vaxt Dubayda olub. Tağı Əhmədov isə istintaqda elə söz demədiyini söylədi. Bu zaman hakim ona çıxıb getməsi göstərişini verdi və o da zaldan çölə çıxdı".

    S.Rəsulov qeyd edib ki, məhkəmədə A.Çovdarov T.Əhmədova düz danışmasını istəyib: "Akif Çovdarov ona söylədi ki, "Tağı Əhmədov, düz danış. Mən 8 il sənin kuratorun olmuşam. Bir dəfə də olsun ki, səninlə aramda telefon danışığı olmayıb". Tağı Əhmədov da bunu təsdiqlədi".

    Daha sonra iclasda T.Əhmədovun oğlu Ruslan və qardaşı oğlu Əhmədov Əli dindirilib.

    Proses günün ikinci yarısında davam etdiriləcək.

    *** saat12:46

    Bakı. 21 iyun. REPORT.AZ/ Prosesdə T.Əhmədov dindirilib.

    "Report"un məlumatına görə, məhkəmə iclasından sonra o, jurnalistlərə açıqlama verməyib.

    T.Əhmədov müxbirlərə "sağ ol" deyib, avtomobilinə əyləşərək, məhkəmə binasından uzaqlaşıb.

    Prosesdə T.Əhmədov A.Çovdarovun vəkillərinin sualını cavablandırıb. Vəkil ona "sizin Akif Çovdarovdan tələbiniz nədir" sualına T.Əhmədov maraqlı cavab verib: "Leyli və Məcnunu hamı oxuyub. Bütün dünya bilir ki, əsərdə söhbət nədən gedir. Hətta Leylinin Məcnundan nə istədiyi də məlumdur. İndi də məhkəmədə hər şey aydındır. Siz də savadlı şəxsiz. Bilmirsiniz ki, mən nə istəyirəm? Verdiyim pulu tələb edirəm".

    T.Əhmədov ifadəsində qeyd edib ki, A.Çovdarov ondan MTN üçün 10 "Gelandewagen" markalı avtomobil alınmasını istəyib: "Ona "yox" cavabını verdim. Həmin vaxt sabiq nazir Eldar Mahmudova zəng elədim. Lakin o, telefonu açmadı. Daha sonra onun köməkçisi ilə danışdım. O bildirdi ki, "nazir sizin işinizi Akif Çovdarova tapşırıb". Eldar Mahmudov mənim yerlimdir. Bir-birimizi çoxdan tanıyırdıq".

    Proses hazırda davam etdirilir.


    *** saat 12:07

    Bakı. 21 iyun. REPORT.AZ/ Sabunçu Rayon Məhkəməsinin inzibati binasında ləğv edilmiş Milli Təhlükəsizlik Nazirliyinin (MTN) Energetika və Nəqliyyat Sahələrində Təhlükəsizlik Baş İdarəsinin sabiq rəisi, general-mayor Akif Çovdarov, həmin idarənin sabiq işçisi, polkovnik Səlim Məmmədov, MTN-in sabiq idarə rəisi, mayor Akif Əliyev və keçmiş şöbə rəisi Orxan Osmanovun cinayət işi üzrə məhkəmə iclası davam etdirilir.

    “Report”un məlumatına görə, Bakı Hərbi Məhkəməsinin sədri Həbib Həsənovun sədrliyi ilə qapalı keçirilən prosesə zərərçəkmiş qismində Bakı Metropolteninin keçmiş rəisi, Yeni Azərbaycan Partiyasının (YAP) Yasamal rayon təşkilatının sədri Tağı Əhmədov da gəlib.

    O, hazırda məhkəmə iclasında iştirak edir. T.Əhmədovun məhkəmədə ifadə verəcəyi gözlənilir.

    Proses davam etdirilir.

    Qeyd edək ki, A.Çovdarov 2015-ci ilin noyabr ayında həbs edilib. Həmin vaxt Səbail Rayon Məhkəməsi onun barəsində dörd ay müddətində həbs qətimkan tədbiri seçib. Sonradan həbs qətimkan tədbirinin vaxtı bir neçə dəfə uzadılıb. O, Cinayət Məcəlləsinin 145.3 (Qanunsuz azadlıqdan məhrum etmə ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olduqda), 179.3.1, 179.3.2 (Mənimsəmə və ya israf etmə mütəşəkkil dəstə tərəfindən külli miqdarda törədildikdə), 181.3.1, 181.3.2 (Quldurluq mütəşəkkil dəstə tərəfindən külli miqdarda əmlak əldə etmək məqsədi ilə törədildikdə), 182.3.1, 182.3.2 (Hədə-qorxu ilə tələb etmə külli miqdarda əmlak əldə etmək məqsədi ilə törədildikdə ), 228.4 (Qanunsuz olaraq qaz silahını, soyuq silahı, o cümlədən soyuq atıcı silahı əldə etmə, satma və ya gəzdirmə), 302.1, 302.2 (Gizli qaydada informasiya alınması üçün nəzərdə tutulmuş texniki vasitələrdən istifadə edilməklə əməliyyat-axtarış fəaliyyəti haqqında qanunvericiliyi pozma), 311.3.1, 311.3.2, 311.3.3, 311.3.4 (Rüşvət alma qabaqcadan əlbir olan bir qrup şəxs və ya mütəşəkkil dəstə tərəfindən hədə-qorxu tətbiq olunmaqla külli miqdarda və təkrar törədildikdə), 313 (Vəzifə saxtakarlığı), 341.2.1, 341.2.2 və 341.2.3-cü (Bir qrup şəxs tərəfindən silah tətbiq olunmaqla hakimiyyətdən sui-istifadə etmə, hakimiyyət həddini aşma və ya hakimiyyətdən istifadə etməmə ağır nəticələrə səbəb olduqda) maddələri ilə ittiham olunur.

    A.Çovdarov və MTN-in Energetika və Nəqliyyat Sahələrində Təhlükəsizlik Baş İdarəsinin sabiq işçisi, polkovnik Səlim Məmmədov, MTN-in sabiq idarə rəisi, mayor Akif Əliyev və keçmiş şöbə rəisi Orxan Osmanovun cinayət işi üzrə ittiham aktı ibtidai araşdırmaya prosessual rəhbərliyi həyata keçirən Azərbaycan Respublikasının Baş prokuroru tərəfindən təsdiq edilərək sentyabrın 5-də aidiyyəti üzrə baxılması üçün məhkəməyə göndərilib.

    Xatırladaq ki, cinayət işi üzrə 320-dən çox şahid, 60-dan çox isə zərərçəkmiş var. Zərərçəkmiş şəxslərə vurulmuş ziyanın ödənilməsinin təmin olunması üçün məhkəmə qərarları əsasında təqsirləndirilən şəxslər A.Çovdarov, S.Məmmədov, A.Əliyev və O.Osmanova məxsus ümumilikdə 33 milyon 466 min manat dəyərində əmlak və pul vəsaitlərinin, o cümlədən 8 milyon 967 min manat dəyərində ticarət və xidmət sahələri, istilikxanalar, balıqçılıq təsərrüfatları və sair əmlak kompleksi, torpaq sahələri, 24 milyon 445 min manat dəyərində fərdi yaşayış evləri, mənzillər, nəqliyyat vasitələri və 37 min manat dəyərində zərgərlik məmulatlarının üzərinə həbslər qoyulub.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi