Yuxarı
    Bağlamaq

    Akif Çovdarov məhkəməyə oksigen balonu ilə gətirilib, o, vəkillərindən imtina edib - YENİLƏNİB-3

    Vəkillər onun səhhətində problem olduğunu deyir

    *** saat 11:40; saat 12:03

    Bakı. 14 noyabr. REPORT.AZ/ Bu gün Sabunçu Rayon Məhkəməsinin inzibati binasında ləğv edilmiş Milli Təhlükəsizlik Nazirliyinin (MTN) Energetika və Nəqliyyat Sahələrində Təhlükəsizlik Baş İdarəsinin sabiq rəisi, general-mayor Akif Çovdarov, MTN-in Energetika və Nəqliyyat Sahələrində Təhlükəsizlik Baş İdarəsinin sabiq işçisi, polkovnik Səlim Məmmədov, MTN-in sabiq idarə rəisi, mayor Akif Əliyev və keçmiş şöbə rəisi Orxan Osmanovun cinayət işi üzrə məhkəmənin baxış iclası təxirə salınıb.

    "Report"un məlumatına görə, Bakı Hərbi Məhkəməsinin sədri Həbib Həsənovun sədrliyi ilə keçirilməli olan prosesin təxirə salınmasına səbəb A.Çovdarovun məhkəməyə gətirilməməsi olub.

    "Report"un əldə etdiyi məlumata görə, bugünki prosesə təqsirləndirilən şəxslərdən yalnız A.Çovdarov məhkəməyə gətirilməyib.

    Bununla bağlı Bakı İstintaq Təcridxanasından məhkəməyə müvafiq arayış göndərilib. Arayışda qeyd edilib ki, onun səhhətində yaranmış problemlərə görə məhkəməyə gətirilməsi mümkün olmayıb. Məhkəmə iclasının A.Çovdarovun iştirakı olmadan davam etdirilməsi gözlənilir.

    Məhkəmə A.Çovdarovun məhkəmə prosesinə gəlməməsi ilə bağlı onun barəsində olan arayışı qəbul etməyib. Çovdarov Sabunçu Rayon Məhkəməsinə gətirilib. O, vəkili Kamandar Nəsibovla görüşmək istədiyini deyib.

    Proses günün ikinci yarısında davam etdirilib. Vəkil Kamandar Nəsibov jurnalistlərə bildirib ki, prosesdə A.Çovdarov vəsatətlə çıxış edib. O, məhkəmə heyətinə etiraz edib. Vəsatət baxılmamış saxlanılıb.

    Vəkilin sözlərinə görə, daha sonra A.Çovdarov vəkillərindən imtina etdiyini bildirib: "Bu vəkillər müalicə işimi həll edə bilmirlərsə, mənim hüquqlarımı müdafiə etmək lazım deyil. Buna görə məhkəməyə yazılı ərizə təqdim edirəm".

    K.Nəsibov vurğulayıb ki, müvəkkili məhkəməyə oksigen balonu ilə gətirilib.

    Proses noyabrın 15-nə qədər təxirə salınıb.

    Qeyd edək ki, A.Çovdarov ötən ilin noyabr ayında həbs edilib. Həmin vaxt Səbail Rayon Məhkəməsi onun barəsində dörd ay müddətində həbs qətimkan tədbiri seçib. Sonradan həbs qətimkan tədbirinin vaxtı bir neçə dəfə uzadılıb. O, Cinayət Məcəlləsinin 145.3 (Qanunsuz azadlıqdan məhrum etmə ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olduqda), 179.3.1, 179.3.2 (Mənimsəmə və ya israf etmə mütəşəkkil dəstə tərəfindən külli miqdarda törədildikdə), 181.3.1, 181.3.2 (Quldurluq mütəşəkkil dəstə tərəfindən külli miqdarda əmlak əldə etmək məqsədi ilə törədildikdə), 182.3.1, 182.3.2 (Hədə-qorxu ilə tələb etmə külli miqdarda əmlak əldə etmək məqsədi ilə törədildikdə ), 228.4 (Qanunsuz olaraq qaz silahını, soyuq silahı, o cümlədən soyuq atıcı silahı əldə etmə, satma və ya gəzdirmə), 302.1, 302.2 (Gizli qaydada informasiya alınması üçün nəzərdə tutulmuş texniki vasitələrdən istifadə edilməklə əməliyyat-axtarış fəaliyyəti haqqında qanunvericiliyi pozma), 311.3.1, 311.3.2, 311.3.3, 311.3.4 (Rüşvət alma qabaqcadan əlbir olan bir qrup şəxs və ya mütəşəkkil dəstə tərəfindən hədə-qorxu tətbiq olunmaqla külli miqdarda və təkrar törədildikdə), 313 (Vəzifə saxtakarlığı), 341.2.1, 341.2.2 və 341.2.3-cü (Bir qrup şəxs tərəfindən silah tətbiq olunmaqla hakimiyyətdən sui-istifadə etmə, hakimiyyət həddini aşma və ya hakimiyyətdən istifadə etməmə ağır nəticələrə səbəb olduqda) maddələri ilə ittiham olunur.

    A.Çovdarov və MTN-in Energetika və Nəqliyyat Sahələrində Təhlükəsizlik Baş İdarəsinin sabiq işçisi, polkovnik Səlim Məmmədov, MTN-in sabiq idarə rəisi, mayor Akif Əliyev və keçmiş şöbə rəisi Orxan Osmanovun cinayət işi üzrə ittiham aktı ibtidai araşdırmaya prosessual rəhbərliyi həyata keçirən Azərbaycan Respublikasının Baş prokuroru tərəfindən təsdiq edilərək sentyabrın 5-də aidiyyəti üzrə baxılması üçün məhkəməyə göndərilib.

    Xatırladaq ki, cinayət işi üzrə 320-dən çox şahid, 60-dan çox isə zərərçəkmiş var. Zərərçəkmiş şəxslərə vurulmuş ziyanın ödənilməsinin təmin olunması üçün məhkəmə qərarları əsasında təqsirləndirilən şəxslər A.Çovdarov, S.Məmmədov, A.Əliyev və O.Osmanova məxsus ümumilikdə 33 milyon 466 min manat dəyərində əmlak və pul vəsaitlərinin, o cümlədən 8 milyon 967 min manat dəyərində ticarət və xidmət sahələri, istilikxanalar, balıqçılıq təsərrüfatları və sair əmlak kompleksi, torpaq sahələri, 24 milyon 445 min manat dəyərində fərdi yaşayış evləri, mənzillər, nəqliyyat vasitələri və 37 min manat dəyərində zərgərlik məmulatlarının üzərinə həbslər qoyulub.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi