Gülağa Tənha Akif Çovdarovun cinayət işində zərərçəkmiş olan şəxsin məhkəməsində ifadə verib - ƏLAVƏ OLUNUB

*** 11:44

Bakı. 7 oktyabr. REPORT.AZ/ Bu gün Bakı Ağır Cinayətlər Məhkəməsində dələduzluqda təqsirləndirilən “Real MTK”nın təsisçisi və rəhbəri İlham Qasımovun cinayət işi üzrə məhkəmənin baxış iclası keçirilib.

"Report"un xəbərinə görə, hakim Zeynal Ağayevin sədrliyi ilə keçirilən prosesdə zərərçəkmiş qismində şair Gülağa Tənha (Gülağa Qəmbərov) ifadə verib.

O, 19,5 milyon dolları İ.Qasımova verdiyini deyib: "İş qurmaq üçün həmin pulu ona verdim. İlham müəllimin səmimiyyətinə inandım. Biz 10 milyon dollara ev tikməli idik. 5 milyon dollara isə işləri tamamlamalıydıq. Lakin işlər alınmadı və o, mənim ailəmi təhqir elədi. Sonra hüquq-mühafizə orqanına müraciət elədim".

İ.Qasımov isə heç kimə qarşı dələduzluq etmədiyini bildirib: "Kimə pul "atmışam" gəlsin üzümə desin. Xeyriyyəçi adamam. Hamısı yalandır. Bizim işlərimiz qaydasında gedirdi. Bu işdə ortaya girən oldu, Gülağa müəllimi qızışdırdı. Onlar fikirləşirdilər ki, Gülağa müəllimlə İlham birləşib hər yerdə binalar tikəcəklər. Bunu həmin şəxsin gözü götürmədi və Gülağa müəllimi aldatdı. Mən Gülağa müəllimi söyməmişəm".

Məhkəmənin növbəti iclası oktyabrın 14-nə təyin edilib.

Qeyd edək ki, İ.Qasımov bu il iyun ayında Baş prokuror yanında Korrupsiyaya qarşı Mübarizə Baş İdarəsi əməkdaşları tərəfindən saxlanılıb. Onun barəsində Cinayət Məcəlləsinin 178.3.2-ci (dələduzluq, külli miqdarda törəldildikdə) maddəsi ilə cinayət işi açılıb. Binəqədi Rayon Məhkəməsinin qərarı ilə İ.Qasımov barəsində həbs qətimkan tədbiri seçilib.

Daha sonra İ.Qasımov barəsində CM-nin 308.2-ci (vəzifə səlahiyyətlərindən sui istifadə) və 313-cü (vəzifə saxtakarlığı) maddələri ittiham irəli sürülüb.

O, 13 milyon manat pulu dələduzluq etməkdə təqsirli bilinir.

Xatırladaq ki,İ.Qasımovun adı ləğv edilmiş Milli Təhlükəsizlik Nazirliyinin (MTN) Energetika və Nəqliyyat Sahələrində Təhlükəsizlik Baş İdarəsinin sabiq rəisi, general-mayor Akif Çovdarovun cinayət işi üzrə zərərçəkmiş qismində keçir.