Yuxarı
    Bağlamaq

    Vaqif Cavadov klubla müqavilə bağlamadan yığmada çıxış etmiş futbolçular siyahısına düşüb

    Siyahıda daha 7 oyunçu yer alıb

    Bakı. 9 iyun. REPORT.AZ/ Öz klubları ilə peşəkar səviyyədə müqavilə bağlamadan milli komandalara çağırılan futbolçuların siyahısı açıqlanıb.

    "Report"un məlumatına görə, 8 oyunçunun yer aldığı siyahıya Azərbaycan yığmasının sabiq hücumçusu Vaqif Cavadov da düşüb.

    V.Cavadov millidə 17 yaşında ikən - 2006-cı ildə Moldova ilə yoldaşlıq görüşündə debüt edib. Həmin vaxt o, Rusiya MOİK-inin gənclər komandasında olub. Gənc forvard peşəkar futbolçu karyerasına bir il sonra "Qarabağ"da başlayıb. Ağdam komandasında kumirə çevrilən Cavadov Hollandiya "Tvente"sinə keçib. Meydana çıxmadan çempion olan forvard Azərbaycana qayıdıb və sonradan Türkiyədə də çıxış edib. Onun son klubu ötən mövsümün ikinci yarısında çıxış etdiyi AZAL olub. Hazırda 28 yaşlı hücumçu klubsuzdur.

    Siyahıya düşən digər futbolçular isə bunlardır:

    Ronni Büxel - 1998-ci ildə 16 yaşında ikən Lixtenşteyn yığmasına çağırılıb. 2000-ci ildə isə o, "Vaduts"la rəsmi müqavilə bağlayıb. 2009-ci il oktyabrın 10-da Azərbaycan yığmasına qarşı DÇ-2010-un seçmə qrup matçında çıxış edib. O, Vaduts şəhərindəki "Raynpark" stadionunda keçirilmiş görüşdə 90 dəqiqə meydanda olub. Oyun Azərbaycan millisinin qələbəsi ilə yekunlaşıb.  İlk qolu 55-ci dəqiqədə məhz Vaqif Cavadov vurub.

    Emanuel Mammana - "River Pleyt" Futbol Akademiyasında təhsil alıb.18 yaşında ikən Argentina yığmasına çağırılıb.7 iyun 2014-cü ildə Sloveniya ilə yoldaşlıq görüşündə debüt edib. Həmin il o, Argentina çempionatında çıxış edən "River Pleyt" futbol klubu ilə peşəkar müqavilə bağlayıb.

    Harri Uilson - 16 yaşında ikən - 2003-cü ildə Uels millisinə çağırılıb.Makedoniya ilə yoldaşlıq görüşündə iştirak edib. Bundan 2 il sonra o, İngiltərənin adlı-sanlı "Liverpul" futbol klubu ilə ilə peşəkar müqavilə bağlayıb.

    Xavyer Maskerano - 2003-cü ildə Argentina millisinə çağırılıb. "Copa America" turniri zamanı yığmada debüt edib.Maskerano həmin ilin yayında "River Pleyt"lə peşəkar müqavilə bağlayıb.

    Luis Peres - 1998-ci ildə 17 yaşında ikən Ekvador yığması ilə yoldaşlıq görüşü üçün Meksika yığmasına çağırılıb. Növbəti il o, Meksikanın "Nekaksa" klubu ilə peşəkar müqavilə imzalayıb.

    Marselo Trobbiani - 1974-cü ildə 19 yaşında ikən Argentina millisində debüt edib. Həmin il o, Argentina çempionatında çıxış edən "Boka Xuniors"la peşəkar müqavilə bağlayıb.

    Migel Senteno - 2008-ci ildə 19 yaşında ikən Meksika yığmasına çağırılıb.Bundan 3 il sonra "Toluka" ilə rəsmi müqavilə bağlayıb. 

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi