Yuxarı

"Trabzonspor" - "Fənərbaxça" oyunu yarımçıq dayandırılıb

Azarkeşlərdən biri meydançaya çıxaraq, yan xətt hakimi Volkan Bayarslana zərbə endirib

Bakı. 25 aprel. REPORT.AZ/Türkiyə Super Liqasının 30-cu turu çərçivəsində  "Trabzonspor" və "Fənərbaxça" klubları arasında keçirilən oyun yarımçıq dayandırılıb.

"Report" Türkiyə mediasına istinadən xəbər verir ki, matçın dayandırılmasına səbəb azarkeşlərinin etdikləri hərəkətlər olub.

Oyunda sevimli komandalarının 0-4 geridə olmasını həzm edə bilməyən trabzonlu azarkeşlər tribunalardakı oturacaqları və başqa yad cisimləri meydana atmağa başlayıblar. Bu vaxt oyun qısa müddətə dayandırılsa da, sonradan davam etdirilib.

Ancaq bir neçə dəqiqə sonra yerli azarkeşlərdən biri meydançaya çıxaraq, yan xətt hakimi Volkan Bayarslana zərbə endirib. Azarkeş yerə yıxılmış hakimi təpikləməyə başlayıb.

Meydançaya başqa azarkeşlərin də daxil olduğunu görən oyunun baş hakimi Bülənt Yıldırım qarşılaşmanı yarımçıq dayandırıb və hər iki komanda soyunub-geyinmə otağına yollanıb.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi