Yuxarı

"Qəbələ" "Xəzər Lənkəran"a böyük hesabla qalib gəlib

Görüş Qəbələnin 6:0 hesabı ilə başa çatıb.

Qəbələ. 4 oktyabr. REPORT.AZ/ Bu gün Azərbaycan Premyer Liqasının VII turunun son oyunu keçirilib. "Report"un məlumatına görə, "Qəbələ" doğma meydanda "Xəzər Lənkəran"ı qəbul edib.

Yağışlı havada Qəbələ şəhər stadionunda keçirilən qaşrılaşmanın 8-ci saniyəsində hesab açılıb. "Qırmızı-qaralar"ın futbolçusu Dodo rəqib qapısına yol tapıb. Bundan sonra oyunu ələ alan Roman Qriqorçukun rəhbərlik etdiyi komanda 10-cu dəqiqədə hesab arasındakı fərqi artırıb. Fakunda Pereyra adını tabloya yazdırıb - 2:0. Stadiona toplaşan azarkeşlər ilk hissənin son dəqiqəsində daha bir qolun şahidi olublar. Bu dəfə Aleksey Qay 45-ci dəqiqədə Orxan Sadıqlını məyus etməyi bacarıb. İlk hissə meydan sahiblərinin 3:0 hesablı qələbəsi ilə başa çatıb.

İkinci hissə də "Qəbələ"nin üstünlüyü ilə davam edib. 76-cı dəqiqədə Aleksey Qay rəqibi bir daha məyus edib və hesab 4:0 olub. 3 dəqiqə sonra lənkəranlıları yenidən Fakunda Pereyra məyus edib. O, 79-cu dəqiqədə komandasının 5-cü, özünün ikinci qoluna imza atıb. Lakin oyunun sonlarına yaxın daha bir qol vurulub. Bu dəfə Emin Zets 89-cu dəqiqədə "ağ-yaşıllar"ın qapısına yol tapıb.

Görüş "Qəbələ"nin 6:0 hesabı ilə başa çatıb.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi