"Qarabağ" bu gün APOEL ilə qarşılaşacaq - AFİŞA

“Qarabağ” bu gün UEFA Çempionlar Liqasında növbəti oyununu keçirəcək.

“Report”un məlumatına görə, Ağdam təmsilçisi III təsnifat mərhələsinin ilk matçı çərçivəsində Kiprdə APOEL-in qonağı olacaq. Nikosiyadakı GSP stadionunda baş tutacaq görüş Bakı vaxtı ilə saat 21:00-da start götürəcək.

Qurban Qurbanovun rəhbərlik etdiyi kollektiv I raundda Albaniya çempionu “Partizani”ni mübarizədən kənarlaşdırıb. Tiranada gerçəkləşmiş ilk matçda hesab açılmasa da, Bakıdakı oyunda Filip Ozobiç və Dani Kintananın qolları “Qarabağ”ı növbəti mərhələyə daşıyıb – 2:0.

Ağdam təmsilçisi II təsnifat mərhələsində İrlandiyanın “Dandolk” komandasında güclü olub. “Oriel Park” stadionunda keçirilən ilk qarşılaşmada 1:1 hesablı heç-heçə qeydə alınıb. Oyunda hesabıMahir Emreli açsa da, Patrik Hoban bərabərlik topunu vurub. “Dalğa Arena”da keçirilən cavab matçı isə Azərbaycan çempionunun 3:0 hesablı qələbəsi ilə yekunlaşıb. “Qarabağ” Xayme Romeronun dublu və Ailton Silvanın vurduğu qolla rəqibini darmadağın edib.

Mübarizəyə II təsnifat mərhələsindən başlayan Kipr çempionu isə Monteneqronun “Sutyeska” komandasını keçib (1:0, 3:0).

APOEL indiyə qədər 2 dəfə avrokuboklarda Azərbaycan təmsilçisi ilə qarşılaşıb. Hər iki halda “Neftçi” ilə üz-üzə gələn nikosiyalılar 1995/1996 mövsümündə Kuboklar Kubokunun I təsnifat mərhələsində sevinən tərəf olublar (3:0, 0:0). Əvəzində 2012/2013 mövsümündə Avropa Liqasının pley-offundan APOEL-dən güclü olan (1:1, 3:1) “Neftçi”, avrokuboklarda qrup mərhələsinə vəsiqə qazanan ilk Azərbaycan klubu kimi tarixə düşüb.

2015/2016 mövsümündə Avropa Liqasının III təsnifat mərhələsində isə “Qəbələ” Kiprin başqa bir komandasını – “Apollon”u mübarizədən kənarlaşdırıb (1:1, 1:0).

Çempionlar Liqası

III təsnifat mərhələsi, ilk oyun

21:00. APOEL (Kipr) – “Qarabağ” (Azərbaycan)

Baş hakim: Davide Massa

Yan xətt hakimləri: Fabiano Preti, Alberto Teqoni

Dördüncü hakim: Rosario Abisso (hamısı İtaliya)

Hakim-inspektor: Vladimir Antonov (Moldova)

UEFA nümayəndəsi: Romano Klavedetşer (İsveçrə)

Nikosiya, GSP stadionu