"Neymar Jr’s Five" futbol turnirinə seçimlər yenidən Azərbaycanda keçiriləcək

Bakı. 19 mart. REPORT.AZ/ İspaniyanın "Barcelona" klubunun ulduz futbolçusu Neymarın şərəfinə adlandırılan "Neymar Jrs Five" gənclər arasında futbol turnirinə seçimlər növbəti dəfə Azərbaycanda keçiriləcək.

“Report” xəbər verir ki, bu il gənclərə yenidən özünü sınamaq imkanı veriləcək.

2016-cı ildə 47 ölkədən 65 min oyunçudan ibarət 10 mindən artıq komanda dünya çempionu adı uğrunda mübarizə aparıb. Azərbaycandan "DeFacto" komandası milli turnirin qalibi olub və ölkəmizi dünya çempionatının finalında təmsil etmək üçün Braziliyaya yollanıb.

Komanda qalib olmasa da, gənc furbolçular dünyanın ən yaxşı furbolçuları ilə oynamaq və şəxsən Neymar ilə görüşmək şansı qazanıblar.

Turnir adətən altı 18-25 yaşlı oyunçudan ibarət komandalar arasında keçirilir. Amma bu il ilk dəfə olaraq hər komandaya 25 yaşdan yuxarı iki oyunçu daxil ola biləcək.

Minlərlə komanda kvalifikasiya mərhələsində qalib gəlmək üçün mübarizə aparacaq; onların məqsədi ölkələrində çempionu olub Braziliyada keçiriləcək final yarışlarına bilet qazanmaqdır. Azərbaycanda kvalifikasiya mərhələsi Quba, Şəki, Gəncə və Bakı şəhərlərində keçiriləcək. Milli final isə mayın 6-sı Bakıda baş tutacaq. Final yarışları Neymarın vətəni Praya-Qrandidə, "Instituto Projeto Neymar Jr" stadionunda keçiriləcək. Neymar bu şəhərdə böyüyüb, turnirin keçirilməsi üçün əsas götürülən furbol növü futzalı oynamağı burada öyrənib.

"Mən həmişə dostlarımla bu tip futbol oynamışam. Turnir mənə uşaqlığımı xatırladır, bununla çox fəxr edirəm. Beş oyunçudan ibarət komandaların yarışdığı oyunlarda qalib gəlmək və rəqiblərin hamısını oyundan çıxarmaq üçün strategiya olmalı, düzgün vaxtda hücum və müdafiə etməyi bacarmaq lazımdır. Düzgün müdafiə qurmaq çox vacibdir, bu bacarıq turnirdə səni çox irəli apara bilər", - deyə Neymar bildirib.

Qalib komanda Neymarın vətəni Braziliyada təşkil olunacaq dünya çempionatında Azərbaycanı təmsil etmək imkanı qazanacaq.