Bakı. 18 sentyabr. REPORT.AZ/ "Neftçi”nin və Azərbaycan milli komandasının qapıçısı Səlahət Ağayev əməliyyat olunacaq.
“Report” paytaxt klubunun rəsmi saytına istinadən xəbər verir ki, Azərbaycan Premyer Liqasının V turunda "Zirə” ilə oyunöncəsi məşqdə zədələnmiş 32 yaşlı qolkiperə sağ budun gətirici əzələsinin vətərinin hissəvi yırtığı diaqnozu qoyulub.
Yığma üzvü sentyabrın 19-da Türkiyənin İstanbul şəhərinə yola düşəcək. Əməliyyat "Acıbadəm” xəstəxanasında baş tutacaq.
Qeyd edək ki, Səlahət Ağayev yay fasiləsində “İnter”dən “Neftçi”yə keçib.