Yuxarı
    Bağlamaq

    “Neftçi”nin baş məşqçisi: "İstəyirəm “Qarabağ” həmişə əsas heyətlə oynasın"

    Elxan Abdullayev: Yaxşı başlamaq istəyirdik, amma alınmadı

    Bakı. 11 avqust. REPORT.AZ/ "Çempionatın startını səbirsizliklə gözləyirdik. Yaxşı başlamaq istəyirdik, amma alınmadı".

    "Report"un məlumatına görə, bunu “Neftçi”nin baş məşqçisi Elxan Abdullayev evdə “Qarabağ”a 1:3 hesabı ilə uduzduqları Azərbaycan Premyer Liqasının ilk turunun açılış oyunundan sonra mətbuat konfransında deyib.

    O, qeyd edib ki, komanda ilk hissəylə müqayisədə fasilədən sonra yaxşı oynayıb: "1:3 hesablı məğlubiyyətdən sonra danışmaq çətindir. Azarkeşlərimiz bu gün yaxşı dəstək oldular. Belə alındı. Növbəti matçlarda qalib gəlməyə çalışarıq”.

    Daha sonra 47 yaşlı mütəxəssis jurnalistlərin suallarını cavablandırıb:

    - Elnur Cəfərovun oyunundan nə dərəcədə razı qaldınız?

    - Matç əvvəldən planlaşdırdığımız kimi getmədi. Buraxdığımız ilk qol planlarımızı pozdu. Elnura vaxt lazımdır. Gənc futbolçudur, gələcəyi var. Nəsə alınmırdı, amma çalışırdı. Necə razı qala bilərəm ki, məğlub olmuşuq. Lakin perspektivi var.

    - “Neftçi” rəqibinə nədə uduzdu?

    - Mən istəyirəm ki, “Qarabağ” həmişə əsas heyətlə oynasın. Çünki çoxdan oynamayan futbolçular özlərini göstərməyi daha çox istəyirlər. İkinci heyət dediyiniz milli üzvlərindən ibarətdir. Təcrübə sözünü dedi. 7-8 ildir bir yerdə oynayan futbolçulardır. Amma bu, o demək deyil ki, biz uduzmalı idik.

    - Səlahət Ağayev “İnter”in “Fola” ilə səfərdəki matçlarında da kobud səhvlərlə yadda qalmışdı. Onunla bağlı nə baş verir?

    - Yəqin ki, özü analiz edəcək. “Fola” ilə oyunu müzakirə etmək istəmirəm. Bugünkü görüşə gəlincə, o epizodda çıxmamalı idi. Qapıda dayanıb, topu tutmağa çıxmasaydı, qol olmayacaqdı.

    - Belə görünürdü ki, oyunu Derlis Meza Kollinin üzərində qurmuşdunuz. Komandaya yeni qoşulduğunu nəzərə alsaq, əsas heyətdə yer verməyə məcbur idiniz?

    - Mən onun oyunundan razı qaldım. Ötürmələrdə səhvi, demək olar ki, olmur. Düzdür, çoxdandır oynamırdı. Amma mənə belə futbolçu lazımdır. Oyundan-oyuna artıracaq.

    - İkinci hissədə “Neftçi”nin oyununda fərqə nə səbəb oldu?

    - Başladıq pressinq etməyə. İlk dəqiqələrdən elə oynamaq istəmirdik. Planım o idi ki, üstünlüyü rəqibə verib, onları əks-hücumda tutmaq. Amma öz səhvlərimizdən qollar buraxdıq və bütün planımız pozuldu.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi